I tregon henen me dore, ai shikon gishtin tregues…

Nje koleg i yni gazetar, Elvis Nabolli, pasi ka qene i pranishem dhe ka pare tmerr me sy per shkak te shperthimit te ndodhur ne katin e pare te nje pallati ne kompleksin “Fishta” ne Velipoje, ka hedhur me nje fryme nje status ne Facebook. Statusi eshte marre nga ShkodraWeb dhe eshte botuar i plote, shoqeruar me nje foto te vete gazetarit. Nenvizojme, nuk esht shkrim por status ne Facebook-un personal te gazetarit. Natyrisht, meqenese tema ishte mjaft e prekshme, ne vendosem ti japim rendesine e duhur ceshtjes qe ngritne me te drejte kolegu Nabolli nga terreni ku po ndiqte ngjarjen. Nuk kemi bere asnje redaktim sepse permes atyre pak rreshtave shprehej shume me teper se ne nje analize te bere me kujdes nga cilado pende, brenda apo jashte Shkodres.

Sipas nesh, shqetesimi ishte mese i ligjshem dhe lidhej me depozitimin e sasive te medha te gazit ne lokalet, ne katet e para te pallateve si ne Velipoje apo edhe kudo tjeter ne Shqiperi. Ne fakt, gazetaret dhe mediat e kane ngritur shume here kete shqetesim dhe per fat te keq, nuk kane munguar rastet kur kane ndodhur fatkeqesi pikerisht nga prania e pikave te gazit apo edhe karburanteve prane zonave te banuara. E kemi perseritur shpesh, por eshte momenti ta riktheksojme se ka nje procedure rigoroze, standarte, ligjore e bazuar edhe ne rregullore te mirepercaktuara se si dhe ku lejohet vendosja, cfare kriteresh duhen plotesuar etj.

Elvis Nabolli ringre per te mijeten here bashke me koleget e tij nje shqetesim. Ndersa disa komentues merren jo me thelbin e ceshtjes. Ka nga ata qe thone se ka edhe ne vende te tjera, ka edhe pika karburanti afer qendrave te banuara. Ka qe bejne edhe shaka, “ku duhet ti mbajme depozitat e gazit, ne terrace”. Por ka edhe qe gjykojne menyren e shprehjes ne nje status Facebook-u te kolegut Nabolli, fjalet e perdorura, drejtshkrimin etj. Normalisht, nuk ka nevoje per avokati, por Nabolli eshte fitues i shume cmimeve ne gazetari, pavaresisht moshes relativisht te re. Madje, cmime te organizatave prestixhoze edhe nderkombetare, te cilat nuk eshte nevoja ti permendim.

Ne rastin e statusit te gazetarit, ajo qe vlen te behet teme diskutimi eshte prania e gazit apo karburanteve prane qendrave te banuara, rrezikshmeria qe ato sjellin per jeten e qytetareve. Te tjerat, jane dhe duhet te jene dytesore. Natyrisht, ne punen tone te perditshme, te gjithe ne gazetaret gabojme, mbase harrojme apo shtojme ndonje germe, presje, pike apo pikepyetje. Dhe perpiqemi ta riparojme sapo e veme re, me aq mundesi sa kemi. Por njekohesisht secili nga ne eshte edhe njeri, qytetar qe ka edhe nje mundesi per tu shprehur sic e ndjen: rrjetet sociale. E pikerisht kete beri Elvis Nabolli. Nuk kerkoi asnjehere qe statusi i tij te behej lajm dhe te postohej dhe te themi te drejten nuk e kemi pyetur fare. Sepse e perserisim, ajo cfare ne deshem te evidentonim ishte thelbi i komentit: rrezikshmerine e depozitimit ne sasi te medha afer qendrave te banuarave te lendeve te djegshme. E natyrisht, nese ka vend, mund ti kerkojme edhe ndjese Elvisit qe e morem pa pyetur statusin e tij, edhe pse teksa e lexon, ai vete ve buzen ne gaz. Ka shkruajtur gjithmone “troc”, si ka menduar dhe besojme se keshtu do te vazhdoje. E per ta mbyllur, asgje nuk vlen me shume se nje shprehje e popullit, e popujve ne fakt: I tregon henen me dore dhe ai shikon gishtin tregues… E kush tjeter… /ShkodraWeb/