Sali Berisha në dhjetor 1990 është konsideruar nga disa si i dërguar i ish- presidentit të fundit komunist Ramiz Alia tek Lëvizja e Studentëve. Pavarësisht se lëvizja bati si bërthamë grupin e shkodranëve në Qytetin “Studenti”, pavarësisht se si lider u konsiderua në fillim Azem Hajdari, Sali Berisha ia doli të zgjidhet kryetar i PD- së, partisë së parë opozitare në këtë vend pas 45 viteve diktaturë.
PD e drejtuar nga ai, humbi zgjedhjet e para pluraliste në 1991. Një vit më pas, PD fitoi me mbi 2/3 e votave, aq sa kishte humbur përballë PPSH- së. Në zgjedhjet vendore të korrikut 1992, Sali Berisha dhe PD humbën përballë PS- së. Në vitin 1994, Sali Berisha kishte dëshirën të miratonte një Kushtetutë me kompetenca të shumta presidenciale, post që ai e mbante nga 1992. Shqiptarët ia humbën referendumin.
Sali Berisha dhe PD fituan zgjedhjet e 26 majit 1996 dhe zgjedhjet vendore të tetorit të atij viti. Në pranverën e vitit 1997, Sali Berisha u rizgjodh si president i Shqipërisë, teksa vendi ishte përfshirë gati në një luftë civile. Me 29 qershor 1997, në zgjedhjet politike të thirrura e nën krismat e armëve dhe hijen e firmave piramidale, PD dhe Sali Berisha humbën zgjedhjet. Berisha dha dorëheqjen nga posti i presidentit.
Nga viti 1991, deri në vitin 2005, nga radhët e PD- së pati largime dhe vetëlargime të rëndësishme. Ndërkohë, pas 1997- ës, Berisha humbi edhe zgjedhjet politike të 2001- it. Pas 8 viteve në opozitë, duke bashkuar thuajse të gjithë të larguarit në vite nga PD, duke krijuar KOP- in, Sali Berisha rikthehet në qeverisje të vendit. Në vitin 2009, Berisha fiton zgjedhjet por nuk ka numrat për të krijuar qeveri. Merr katër mandate “të arta” nga Meta për të qendruar edhe 4 vite kryeministër në pushtet.
Në vitin 2011, me Lulzim Bashën si kandidat, largon Edi Ramën nga posti i kryetarit të Bashkisë Tiranë pas 11 viteve. Dy vite më pas, pas 8 viteve në pushtet, Sali Berisha rikthehet në opozitë. Jep dorëheqjen nga kryetar i PD- së dhe mbetet deputet i thjeshtë. Ka ndikim në zgjedhjen e pasuesit në garën në mes Lulzim Bashës dhe Sokol Olldashit por edhe mbështet Bashën për 8 vite në krye të PD- së.
PD humbet zgjedhjet edhe në 2017- ën, duke e ripërsëritur edhe me 25 prill 2021. Për herë të parë në këtë vend, një parti politike e madhe nis mandatin e tretë në opozitë dhe një tjetër në qeverisje, po aq mandate. Sali Berisha shpallet “non grata” nga SHBA. Nën presion amerikan të deklaruar, Lulzim Basha pezullon Berishën nga antarësia në Grupin Parlamentar të PD- së.
Me 9 shtator 2021, Sali Berisha projekton dhe fillon turin e tij me antarësinë nën emrin “Foltore”. Fillimisht, kërkoi referendum për vendimin individual të kryetarit Basha në dëm të tij. Më pas, shpalosi ambicien për kryetar të PD- së dhe kryeministër i ardhshëm i Shqipërisë. Nga ajo ditë, nuk kanë reshtur takimet e tij, duke kulmuar me shpalljen e Kuvendit Kombëtar të PD- së me mbledhjen e rreth 5000 fimave të delegatëve demokratë. Kjo, 8 vite pas largimit nga qeverisja e vendit dhe po kaq nga postet ekzekutive zyrtare në PD.
Hyri në politikë duke lënë mënjanë bluzën e mjekut (për të mos e veshur më kurrë) në moshën 46 vjeçare dhe tenton rikthimin sërish, me ambicie edhe më të mëdha për rithemelim të PD- së, në moshën 77 vjeçare. 11 dhjetor 2021, është dita e takimit të tij me historinë. Është folur për “Berishën I”, për “Berishën II”, në kuptimin që zakonisht përdorët për monarkët. A do të kemi edhe një “Berishë III”? Përvjetori i themelimit të PD- së nuk është larg… /ShkodraWeb/
