Pyetja një milion dollarëshe është: Nëse Grida Duma do të ishte deputete e PD- së në qeverisjen qendrore të vendit, a do të jepte dorëheqjen nga mandati në favor të kalimit në media si moderatore?!
Më shumë është pyetje retorike, përgjigjen e të cilës e ka secili në mendje. Sepse është e qartë, një deputet në opozitë nuk ka hapësirat e privilegjet e një kolegu, pjesë e një mazhorance qeverisëse.
Lëvizja e Dumës nga ulësja në Kuvend në karrigen e moderatorit, nuk ka dyshim se është bërë për më shumë para. Madje, ish- deputetja nuk ka patur as edhe ndonjë ide të veten origjinale, por do të jetë Sokol Balla i “Top Story”, të paktën sipas asaj që po thuhet në ambientin mediatik këto ditë.
Grida Duma, të paktën nga viti 2005 e në vijim, sidomos pas 2013- ës kur “kasta e vjetër” e zonjave në PD u nxorr në hije nga Basha, ajo ishte imazhi kryesor i partisë më të madhe opozitare sot në vend.
Falë këtij imazhi, pozicioneve e lidhjeve gjatë 8 viteve të qeverisjes së PD- së në 2005- 2013, profesionit të pedagoges në një nga universitetet që mirëpaguajnë, së fundi edhe me krijimin e G- Akademi, me skenat kur rrethohej nga 4 badigardë që “nuk punojnë apo paguhen” me ujë, Grida Duma nuk ka lënë asnjëherë përshtypjen e një deputeteje që “pret rrogën e shtetit” për të arritur në fund të muajit. Pa folur për kostot e veshjeve, bizhuterive, aksesorëve, makinave etj.
Historia e shumë shteteve e vendeve, edhe limitrofe, sjell me dhjetra shembuj të kalimit nga politika në media dhe anasjelltas. Madje, ka raste që nga media është kaluar në politikë për tu rikthyer sërish dhe në kahun e kundërt. Përgjithësisht, askush nuk e ka deklaruar se kalon për arsye financiare, por më shumë në emër të parimeve. Deri tani, perceptimi i krijuar është ai i lëvizjes së Dumës në emër të një “jete më të mirë” në kuptimin ekonomik.
Dy paragrafët e fundit të këtyre rreshtave, janë antagonistë. Por nuk duhet harruar se shqiptari “nuk ngihet” (ngopet) kurrë me fëmijë, shtëpi e para (pasuri). Por ikja e Dumës nga politika drejt prozhektorëve të një studio televizive, pa dhënë as shkëndijën më të vogël të një talenti mediatik, tregon eshe mosbesim ndaj aftësive të familjes së saj politike për të ardhur në qeverisje.
Viti 2025 nuk është aq larg sa për të mos garantuar “mbijetesën” ekonomike të Dumës dhe familjes së saj. Por mesa perceptohet, Duma nuk ka as besimin më të vogël se PD- ja vjen në pushtet në zgjedhjet politike të 2025- ës. Kështu që, është momenti i “ndryshimit” të madh, në emër të parave, në një media si Top Channel, e cila mesa duket ka synim tashmë kundërvënien ndaj qeverisë. “Nora e Kelmendit”, spikati edhe javët e fundit në përballjen me kryeministrin Rama nga foltorja e Kuvendit.
Apologjia e Grida Dumës në momentin e dorëheqjes nga mandati i deputetit, ngjason me shprehjen e famshme të një filmi të real- socializmit: Është si puna e hirit që mbulon atë të maces! Megjithatë, shpresojmë e urojmë të ketë qenë zgjedhje e lirë e vetë ish- deputetes së PD- së. Dhe nuk do të ishte aspak çudi që pas rreth 2 viteve e gjysmë, ta shohim sërish në ulësen e Kuvendit. Shembujt nuk mungojnë… /Nga Blerti DELIJA/
