OPINION – Çfarë kuptimi ka të vijojë kjo qeverisje nëse edhe numri 2 i saj përfundon në duart e drejtësisë e pas hekurave…?!

Ishte përfolur prej javësh por sot, si rrufe në qiell të hapur, ndodhi. Pa orë pasi Bajram Begaj u zyrtarizua si President i Shqipërisë, do të ketë në tryezë kërkesën e kryeministrit Rama për shkarkimin e numrit 2 të qeverisë, Arben Ahmetaj ose “tigri” si njihet në rrethe politike. Rama e ka firmosur me nxitim me 24 korrik 2022 kerkesën për shkarkimin e Ahmetaj, por e ka bërë publike vetë personalisht në Twitter.

“Tigri” në jo pak raste, është paraqitur si ndërmjetës i mundshëm Meta- Rama në përplasjet jo të pakta të 9 viteve të fundit. Ahmetaj, ishte ndër personat që presidenti Meta e vlerësonte edhe publikisht ish- zëvendëskryeministrin tashmë. Kohët e fundit, Ahmetaj u përfol si i përfshirë në aferën e inceneratorëve, ndërsa tashmë shkarkimi i tij mund të jetë vetëm hapi i parë, siç ka ndodhur me të tjerë ish- ministra…


Rastet e ngjashme të deritanishme, nga Saimir Tahiri, Lefter Koka, Alqi Bllako por deri diku edhe Fatmir Xhafaj, tregojnë se edhe “tigri” është futur në të njëjtën rrugë. Me gjasë, tashmë si deputet i thjeshtë, Ahmetaj do të përballet me drejtësinë dhe ndoshta, mund të ketë edhe fatin e dy ish- ministrave Tahiri e Koka.

Ndërsa lajmi për shkarkimin e Ahmetaj kishte marrë dhenë, në SPAK është paraqitur sot Blendi Gonxhe, një personazh jo pak i rëndësishëm i 9 viteve të fundit të qeverisjes socialiste. Nuk ka informacione për arsyen e paraqitjes së Gonxhes në SPAK, por me shumë mundësi, nuk ka qenë një paraqitje me dëshirë apo spontane. Gjithsesi, mbetet të shihet në ditët në vijim.

Pyetja që duhet ngritur, nëse edhe “tigri” Arben Ahmetaj kalon në duart e drejtësisë, hetohet dhe dënohet, çfarë kuptimi ka që qeverisja aktuale të vijojë e pashqetësuar të udhëheqë shqiptarët deri në fund të këtij mandati që i kanë mbetur edhe 3 vite…?! Nëse drejtësia fajëson e dënon numrin 2 të qeverisë, çfarë duhet të ndodhë më shumë që shqiptarëve tu jepet e drejta të rivotojnë për të zgjedhur atë që dëshirojnë ti qeverisë?

Është e qartë, e sigurtë, se nga ekzekutivi, kanë provuar dyert e dënimet e drejtësisë nga të gjitha nivelet. I vetmi mbetet kryeministri, i cili për shumë e shumë arsye, nuk ka shanse të paraqitet në SPAK a ndonjë prokurori tjetër. Nëse korrupsioni, abuzimi, shpërdorimi i detyrës ka hyrë si virus nga niveli më i ulët deri në më të lartin e qeverisjes- zëvendëskryeministrin, a ka kuptim të vazhdojë qeverisjen kryeministri aktual i vendit?

Në një shtet normal, çdo qeveri do të kishte rënë për shumë më pak dhe prej shumë kohësh. Meqë negociatat për antarësim në BE tashmë janë zyrtarisht të hapura, është momenti që kjo mazhorancë, kjo qeveri, ky kryeministër, të japë shembullin se mbështetet në parimet e Europës së Bashkuar. Numrat e mandateve zerohen para moralit në politikë. Të paraqitet para votuesve, me arritjet e mëkatet e veta. Nuk është bonus për opozitën, të paktën këtë opozitë. Nëse votohet përsëri, të vijojë qeverisjen. Sepse jemi të qartë se çdp popull meriton qeverinë që ka. Por zgjedhjen duhet ta bëjnë vetëm shqiptarët. Mundësisht të lirë e të pandikuar! /Nga Blerti DELIJA/