Nga Arben MANAJ, gazetar
Ambasadorët e huaj në Tiranë sillen si rrallë në vende të tjera dhe kjo ndodh aty ku dinjiteti shtetëror dhe respekti ndaj vendit dhe popullit ku akreditohen është minimal! Ka një Konventë që është ajo e Vjenës për sjelljen dhe praktikën diplomatike në botë, e cila shkelet me kembë në Shqipëri!
Shqiptarët mund të mos jenë të pasur, por budallenj nuk janë! Se kë zgjedhin dhe kë preferojnë ata është puna jonë si shqiptarë siç është e amerikanëve kur zgjedhin Trampin apo Biden, siç është e anglezëve kur zgjedhin Blerin apo Johnsonin!
Shqiptarët e Shqipërisë janë po aq të zgjuar sa edhe shqiptarët e Kosovës kur zgjodhën Kurtin herën e parë edhe kur e rizgjodhën kur e rrëzuan me udhëzime hëren e dytë!
Na hapët barkun me show tepër të lexueshëm mbështetjesh, pasi keni humbur pikë që kur toleruat pavarësisht nga rrethanat, zgjedhje një-partiake në mes të Evropës kur nuk i toleroni në vendet nga vini!
Unë me Berishën kam një histori të vjetër hakmarrje nga ai për mua, deri në kërcenime me vdekje për punen time si gazetar i BBC në Londër! Por nëse doni që ta hiqni qafe nga politika shqiptare, rruga që po ndiqni vetem i shton inatin një pjese të shqiptarëve për ta ringritur nga varri politik!
Shqiptarët janë të zgjuar dhe dinë sa edhe ju që herë bëni sikur nuk i njihni disa të korruptuar të tjerë po aq ose më shumë se Berisha e njerëzit e tij, se cilët janë e ardhmja e këtij vendi!
Besojuni intuitës së tyre dhe mos i ofendoni me “ndërhyrjet nga jashtë” të cilat nuk përmbytën dot as Enver Hoxhën!
Po bëni të kundërtën! Por më e rrezikshmja është se po humbni besimin e shqiptarëve tek ju se jeni të sinqertë, frymëzim dhe destinacion! Shumë gjera rikuperohen në jetë, por kur thyhet besimi asgjë nuk funksionon më pas!
Mos i ndani shqiptarët në parcela, aq më teper të vini në dyshim orientimin e tyre pro-përendimor, sado qofshin në numër, aq më tepër ata që kanë vuajtur për dekada se kanë qenë të tillë!
Para 30 vjetesh ishit të justifikuar të na merrnit për dore dhe të na tregonit rrugën në dalje nga izolimi komunist, por sot “thanks, but no thanks”!
Na respektoni inteligjencën! Shtëpia e shqiptarit është vërtetë e mikut dhe e Zotit, por zotër në shtëpinë tonë mos u bëni!