Vllaznia luan këtë të mërkurë një ndeshje shumë të rëndësishme, atë të kthimit përballë Egnatias për gjysmëfinalen e Kupës së Shqipërisë. Në ndeshjen e parë, kuqeblutë janë mundur 0- 1 ndërsa dy futbollistë u penalizuan edhe me kartona të kuq.
Në daljen e zakonshme para mediave, ishin trajneri Qatip Osmani dhe kapiteni Bekim Balaj, tregues edhe i rëndësisë që ka për klubin shkodran kjo ndeshje, e cila mbase mund të vlejë edhe një sezon, si një mundësi e mirë për të siguruar Europën e futbollit për këtë sezon.
Fillimisht ka folur Balaj por më pas edhe Osmani, kanë folur për optimizëm në kampin kuqeblu. Të gjithë mendojnë për një kualifikim në klub, edhe pse përballë kanë kryesuesit e Superligës dhe kanë humbur ndeshjen e parë në Rrogozhinë.
Megjithatë, e rëndësishme është mbështetja e tifozëve dhe si Balaj ashtu edhe Osmani, presin që ajo të mos mungojë ditën e merkurë, duke nisur nga ora 18.00 në “Loro Boriçi” ku Vllaznia kërkon finalen e tretë të kupës në katër vitet e fundit.
