Ditën e sotme, në oborrin e selisë së PD- së në Tiranë, dega e demokrate e Shkodrës ka publikuar emrat e delegatëve që kanë firmosur për mbledhjen e Kuvendit Kombëtar me 11 dhjetor 2021.
Para mediave ka folur fillimisht Irena Shestani, nënkryetare e degës së PD- së Shkodër, e cila ka thënë se kanë fismosur 232 delegatë nga 330 në total që janë delegatë të Kuvendit Kombëtar ose rreth 70% e totalit.
Në vijim, Arvit Bushati, kryetar i FRPD- së Shkodër, ka lexuar të gjithë emrat e delegatëve që kanë firmosur. Përmes një postimi në Facebook, ish- kryeministri Berisha i ka falenderuar zyrtarisht delegatët firmëtarë të Shkodrës.
“Falenderoj nga zemra delegatet firmetare te Deges Shkoder per guximin dhe dinjitetin ne administrimin dhe mbrojtjen e procesit te mbledhjes se firmave per Kuvendin e dt 11 Dhjetor, sikunder u bej thirrje te gjithe delegateve te bashkohen me ne, në Ditelindjen e Partise Demokratike! Te bashkuar drejt Fitores!”, shkruan Berisha.
Ndërkohë, në rrjet qarkullon një video me deklarimet e degëve për delegatët që kanë firmosur deri tani për Kuvendin Kombëtar me 11 dhjetor. Sipas këtij spoti, tashmë janë publikuar emrat e 2171 delegatëve, duke kaluar numrin e duhur për të thirrur Kuvendin Kombëtar të PD- së.
