Një incident i pakëndshëm ka ndodhur në një banesë në Elbasan, ku një fëmijë 5 vjeç është harruar i mbyllur nga prindërit e tij. Ngjarja ka ndodhur mesditën e sotme në qytetin e Elbasanit. Burime zyrtare nga policia bënë me dije se në mesditë ka ardhur një telefonatë se në katin e 6-të të një pallati në Lagjen “Partizani” një fëmijë 5-vjeçar kishte mbetur brenda në banesë. Fill pas sinjalizimit në vendin e ngjarjes mbërritën forcat policore dhe shërbimet e zjarrfikëses.
Pas ndërhyrjes së tyre në kohë reale u bë e mundur hapja e derës në katin e 6 të pallatit në Lagjen “Partizani” ku ndodhej fëmija 5-vjeçar. Drejtoria Vendore e Policisë Elbasan u bën thirrje të gjithë qytetarëve dhe prindërve që të jenë më të kujdesshëm para se të dalin nga banesa. Blutë e Elbasanit gjejnë rastin të falënderojë qytetarët për bashkëpunimin dhe i fton ata të telefonojnë për çdo rast në numrin pa pagesë 129.
