Me 8 nëntor të këtij viti, Bashkia e Shkodrës mori nën administrim kinema “Millennium”, e vetmja në këtë qytet. Pas rreth 23 viteve, ish- kinema “Republika” i rikthehet administrimit publik, pasi thuajse kishte humbur plotësisht funksionin parësor për ti cilin iu dha privatit në administrim.
Tashmë, ambjentet e jashtme, ato të një bar- restorantit, janë hequr totalisht dhe ndërtesës i është rikthyer pamja, e cila në fakt, është më të veçantat e qytetit, në një rrugë mjaft të frekuentuar, raporton ShkodraWeb.
Në një publikim në rrjetet sociale, shoqëruar me video, kryetari i Bashkisë Shkodër Benet Beci shkruan: “Mirëmëngjes! Kinemaja nis transformimin për t’u kthyer në identitet, si një hapësirë publike në funksion të qytetarëve të Shkodrës, si një vlerë e trashëgimisë dhe artit.”.
Bashkë me teatrin “Migjeni”, kjo kinema është ndoshta ndër institucionet më të rëndësishme kulturore jo vetëm për vlerat e trashëguara por edhe misionin që kanë. Me gjasë, keto dy institucione mund të kenë një administrim të përbashkët për të rikthyer edhe njëherë kinemanë në Shkodër, si një atraksion dhe argëtim që nuk vdes kurrë. Ndoshta transformimi duhet të nisë nga rikthimi i emrit “Republika”, për të vijuar me pamjen e jashtme dhe më pas atë të brendshme.