Nga 8 nëntori i këtij viti, ish- kinema “Millennium”, dikur me emrin “Republika”, është rikthyer në administrimin e Bashkisë Shkodër. Për rreth 23 vite, ajo u administrua nga privatë, duke humbur thuajse totalisht funksionin e parë, atë të kinemasë.
Hapi i parë pasi e mori bashkia në administrim, ishte lirimi i pamjes së saj, duke larguar cadrat, karriget dhe tavolinat e bar- restorantit në pjesën ballore- pistës, së saj. Pas këtij pastrimi, ajo u përdor edhe për një takim të ish- kryeministrit Berisha me rastin e “13 dhjetor 1990”.
Ndërkohë, tashmë ka nisur puna konkrete, me restaurimin e fasadës së kinemasë së vetme në Shkodër. Njoftimin e ka dhënë vetë kryebashkiaku Beci, duke publikuar edhe një video, ku shihen skelat dhe punëtorët që po i montojnë.
“Mirëmëngjes! Ka nisur puna për transformimin e godinës së kinemasë në Shkodër. Fillimisht do të restaurohet fasada e kësaj godine si fazë e parë për t’i kthyer asaj identitetin.”, shkruan kryebashkiaku Beci në publikimin e tij.