Kryetari i Bashkisë së Shkodrës, Bardh Spahi dha mesazhin se protestat duhet të jenë të vazhdueshme, me qëllim largimin e qeverisë. Në fjalën e tij në protestën e opozitës, ai u shpreh i bindur se opozita do të fitojë, ndërsa theksoi është kjo qeveri që duhet të largohet dhe jo shqiptarët.
“Ata duan të na shohin të dorëzuar, por ne nuk jemi dorëzuar më parë dhe nuk dorëzohemi as tani dhe as kurrë”, tha Spahia.
Bardh Spahia: Protesta jonë duhet të jetë e pandalshëm! Ne jemi shndërruar në popullin e gomoneve sepse këtu vota blihet, pasuri vidhet, ekonomia rrënohet dhe familjet largohen.
Në rini edhe unë kam ikur nga Shqipëria, por u riktheva me ëndrrën se vetëm këtu mund të jetoj me familjen. Nuk duhet të ikim ne nga vendi, por është koha të ikë qeveria. Nëse qëndrojmë indiferent asgjë nuk ndryshon.
Reagim është i vetmi opsion. Ne duhet të protestojmë, të luftojmë dhe ne duhet të fitojmë. Ne sot kemi fituar një betejë. Qeveria ka frikë nga ne dhe nga ju.
Ata duan të na shohin të thyer, të lodhur. Por ne sot jemi të bashkuar, jo vetëm demokratë, por edhe socialistë. Ata duan të na shohin kokë ulur, por ne jemi kokë lart dhe duam ndryshimin që po vjen. Ne do të fitojmë për fëmijët tanë, për familjet tona dhe për atdheun tonë.
