“Në Asamblenë e zgjeruar të Partisë Socialiste në Shkodër. Krenar që jam pjesë e nje ekipi plot energji, dëshirë e vullnet për të bërë më të mirën për Shkodrën!”, kështu shkruan deputeti Benet beci në një publikim në faqen e tij zyrtare në Facebook, shoqëruar me disa foto të mbledhjes së Asamblesë së zgjeruar të PS- së Shkodër.
Në këtë takim, ishte e pranishme edhe drejtuesja politike e PS- së për qarkun Shkodër Elisa Spiropali dhe paraardhësja e saj në këtë pozicion, Edona Bilali. Kjo mbledhje ka patur si synim kryesor prezantimin e Benet Becit si drejtues politik i ÇS- së për Bashkinë Shkodër, pas emërimit në mbledhjen e kryesisë së PSSH- së të zhvilluar të enjten në Tiranë.
Kjo lëvizje politike, duket se është thuajse zyrtarizim i Benet Becit si kandidat i PS- së për Bashkinë Shkodër me 14 maj 2023. Pak a shumë, ai vendoset në të njëjtat pozita politike në partinë e tij, ashtu si edhe rivali i tij i pritshëm nga krahu tjetër kryebashkiaku Bardh Spahia, i cili edhe ai mban pozicionin e drejtuesit politik të PD- së për qarkun Shkodër.
Ndërkohë, të njëjtat foto i Beci ka publikuar edhe Elisa Spiropali, duke e shoqëruar me një fjali të vetme: “Me Asamblenë e zgjeruar të Partisë Socialiste filluam punën për t’i dhënë Shkodrës të ardhmen që meriton”. Pak a shumë, në një linjë me Becin, por pa guxuar të permendë as zgjedhje e as kandidim.
Prej kohësh ShkodraWeb kishte zbuluar se Benet Beci mund të ishte kandidati më i mundshëm i PS- së për Bashkinë Shkodër, nisur nga informacione nga njerëz pranë deputetit socialist. Madje, Beci ka marrë paraprakisht dakordësinë jo vetëm të Ramës, strukturave socialiste të Shkodrës por edhe të aleatëve potencialë të PS- së. Posti i ri politik i Becit, mund të lexohet edhe thuajse si shpallje kandidature për bashkinë e Shkodrës, por gjithsesi deputeti socialist duket se është akoma në fazën e testimit dhe sondimit të mbështetjes që mund të marrë. Gjithsesi, duket se ai ka marrë garanci të mjaftueshme se edhe në rast të mos qenies më deputet, të ketë një pozicion shumë të rëndësishëm në kuadër të mazhorncës aktuale. /ShkodraWeb/
