SUPERLIGA/ Kamza nis presionin ndaj FSHF-së dhe Laçit para ndeshjes, akuza në drejtim të arbitrit

FK Kamza, në mënyrë të paprecedent ka nisur presionet e hapura në prag të sfidës së rëndësishme me Laçin ditën e sotme. Në faqen e vet zyrtare, kamzalinjtë hedhin akuza të rënda për arbitrin e caktuar për drejtimin e takimit me Laçin, mjaft i rëndësishëm për fatet e Superligës. Në fakt, Kamza kërkon të intimidojë, nisur edhe nga faktet tanimë të njohura se Laçi do të luajë futboll, nuk do të tolerojë sepse synon të arrijë në Kupat e Europës, siç është normale.

Akuzat janë në nivelin e shpifjeve të ulta, duke nisur nga Armir Grima. Kamzalnjtë mesa duket nuk janë informuar se Grima nuk është më zyrtar i Vllaznisë, madje i asnjë klubi tjetër. Grima është trajner i Kombëtares së femrave dhe FSHF i ka besuar edhe administrimin e stadiumit “Loro Borici” deri sa të kalojë në menaxhimin e Bashkisë Shkodër.

Nuk është e qartë nëse do të reagojë vetë Grima apo edhe Klubi “Vllaznia”, i cili akuzohet direkt përmes togfjalëshit “matrapazët drejtues nga Shkodra”. Është momenti që të ndërhyjë me forcë drejtësia e vertetë, teksa FSHF ose nuk ka mekanizma, ose është e pafuqishme të reagojë kur kryebashkiaku Xhelal Mziu i Kamzës hedh dyshime e akuza publike për manipulim rezultatesh.

Me këtë atmosferë, a mund të zhvillohet e qetë një ndeshje në Kamzë? Çfarë mund të ndodhë nëse Laçi fiton atje? Kush do të mbajë përgjegjësinë? Sepse tashmë doza e akuzave është rritur ndjeshëm dhe vijnë pikërisht nga klubi kamzali. Duhet ti jepet fund njëherë e mirë këtyre zërave që vetëm dëmtojnë futbollin.

MUND TË LEXONI EDHE: MINUTA E FUNDIT/ Vllaznia reagon ndaj akuzave të Kamzës: Nuk janë në të mirën e futbollit dhe dy qyteteve…