Skandal/ Zhduken tek “Drejtesia” 300 bylyzyke per mbikqyrje elektronike, 2 mln euro vlera

300 byzylykë për mbikëqyrje elektronike të të pandehurve me vlerë rreth 2 milionë euro mungojnë në Ministrinë e Drejtësisë.
Edhe pse ky institucion i ka paguar paratë dhe duhet të kishte në inventarin e saj, Ministri i Drejtësisë Gazment Bardhi thotë se këto pajisje të shtrenjta dhe me rëndësi të lartë, mungojnë.
Përmes një shkrese që mban datën 1 gusht, ministri u drejtohet kompanive që kanë fituar tenderin t’i kthejnë byzylykët, të cilët duket se kanë shëtitur mes disa zyrave, të paktën shkresërisht, pasi ekzistenca e tyre fizike ngelet e paprovuar.
Nga shkresa e ministrit kuptohet se Ministria e Drejtësisë ka marrë në muajin mars të këtij viti në shërbim këto byzylykë me kartë SIM dhe ja kaluar Drejtorisë së Përgjithshme të Shërbimit të Provës, institucion i cili duhet t’i përdorte. Pikërisht në këtë pikë, fillon mjegulla e kësaj ngjarjeje të paprecedentë dhe me kosto të lartë për shtetin.
Bardhi: Të kthehen byzylykët për mbikëqyrje elektronike
Ministri Bardhi thotë se Shërbimi i Provës nuk ka respektuar procedura ligjore të marrjes së dorëzim të kapitalit. Madje, me një veprim të dyshimtë, në 11 prill, Shërbimi i Provës përmes një akti dorëzimi që mban numër protokolli 834, ia ka dhënë sërish 300 byzylykët firmës prodhuese.
Nuk dihet zyrtarisht se pse është bërë ky veprim dhe pse Shërbimi i Provës i ka dhënë kompanisë prodhuese të mbajë këto sende të kushtueshëm që tashmë ishin pronë e saj. Në një komunikim që Report TV ka pasur me Ministrinë e Drejtësisë, argumenti, edhe pse jo zyrtar, është se byzylykët ishin të pa kolauduar.
Tashmë, ministri Bardhi i dërgon një kërkesë bashkimit të operatorëve prodhues, duke ju kërkuar që të sjellë pranë ministrisë byzylykët. Kompanitë refuzojnë të sjellin byzylykët, pasi thotë se akti i shitjes është kryer një herë, madje pretendojnë se ministri po ju bën presion.
Në këto kushte, Bardhi paralajmëron kompaninë se po administron në mënyrë të paligjshme byzylykët që Ministria e Drejtësisë që i ka blerë. Për këtë arsye, Bardhi ka paralajmëruar se në rast të mos kthimit të 300 byzylykëve, çështja do t’i referohet Prokurori. /SHQIPTARJA.COM/