Shuhet patriarku i gazetarisë italiane, ishte ndër personalitetet më me ndikim në vendin përtej Adriatikut

Nga Italia vjen lajmi i keq! Ndërroi jetë në moshën 93-vjeçare, Piero Angela, i pagëzuar si “patriarku italian” i gazetarisë dhe popullarizimit të shkencës në televizion. Njoftimin e dha sot familja e tij. Në një postim në rrjetet sociale, ku Alberto Angela bëri të ditur vdekjen e babait të tij, shkruan:

“Rrugëtim të mbarë në përjetësi, baba!”.

I lindur në Torino në vitin 1928, Piero Angela e filloi karrierën e tij në gazetari në “RAI” si gazetar radioje, ndërsa më vonë u bë korrespondent dhe prezantues lajmesh.

Popullariteti i tij i gjerë në botën e televizionit ka të bëjë me programet popullore shkencore, që themeluan një traditë solide të dokumentarëve shkencorë në televizionin italian.

Piero Angela gjithashtu është autor i shumë librave kushtuar shkencës: Në Kërkim të Jetës në Kozmos (1980); Makineria që Mendon (1983); Oqeanet (1991); Sfida e Shekullit (2006); Përse Duhet të Bëjmë më Shumë Fëmijë (bashkë-autor me L. Pinna, 2008); Për Çfarë Duhet Politika? (2011); Pas Kuintave të Historisë; Jeta e Përditshme në Kohëra (bashkë-autor me A. Barbero, 2012); Udhëtim në Mendje: të njohim trurin që të jetë i shëndoshë (2014); 13 Miliardë Vjet; Sytë e Mona Lizës (2016) etj.

Në vitin 2017 botoi autobiografinë e tij e titulluar “Rrugëtimi im i Gjatë”. Në vitin 2004 iu akordua titulli Oficer i Lartë i Urdhërit të Meritës së Republikës së Italisë, si dhe titulli Kalorës i Kryqit të Madh të Republikës së Italisë në vitin 2021.

Më poshtë, letra e fundit publike e Piero Angela

Të dashur miq, më vjen keq që nuk jam më me ju pas 70 viteve së bashku. Por edhe natyra ka ritmet e saj. Kanë qenë vite, për mua shumë stimuluese, që më kanë bërë të njoh botën dhe natyrën njerëzore.

Mbi të gjitha, kam patur fatin të njoh njerëz që më kanë ndihmuar të realizoj atë që çdo njeri do të dëshironte të zbulonte. Falë shkencës dhe një metode që mundëson përballimin e problemeve në mënyrë racionale por në të njëjtën kohë, njerëzore.

Pavarësisht një sëmundje të gjatë, ia kam dalë të çoj në fund të gjitha emisionet e mia dhe projektet e mia (madje edhe një kënaëqsi të vogël: një disk me muzikë jazz në pianoforte…). Por edhe 16 seri të dedikuara për shkollën mbi problemet e mjedisit dhe energjisë.

Ka qenë një aventurë e jashtëzakonshme, e jetuar intensivisht dhe e mundësuar falë bashkëpunimit të një grupi të madh autorësh, bashkëpunëtorësh, teknikësh dhe shkencëtarësh.

Sipas meje, jam përpjekur të tregoj atë që kam mësuar. Shumë të dashur të gjithë, mendoj se e kam bërë pjesën time. Përpiquni të bëni edhe ju tuajën për këtë vendin tonë të vështirë.

Një përqafim të madh,

Piero Angela