Pesë vjet më parë arti dhe kultura në Malësi të Madhe, në qarkun e Shkodrës por edhe më gjërë, mori lajmin e trishtë për ndarjen nga jeta, shumë para kohe, të këngëtarit të mirënjohur Arben Delaj.
Iku papritur në moshën 48 vjeçare, duke lënë pas shumë dhimbje, lot, trishtim e sot, edhe mall për familjen, miqtë, të njohurit dhe amatorët e artit të tij. Çdo vit, në pervjetorë lindje dhe ikje nga kjo jetë, në festa të rëndësishme fetare dhe jo vetëm, familja dhe të afërmit e kujtojnë vazhdimisht me mjaft respekt e mall.
Në këtë 5- vjetor të ndarjes nga jeta, Betin, siç e thërrisnin në përkedhëli që i vogël familjarët e të afërmit, e kujtojnë sërish. Aida, bashkëshortja, e cila ka bashkuar edhe në Facebook emrin e saj me të Arbenit, e kujton me disa foto dhe një dedikim: “5 vjet pa ty fizikisht po ti je gjithmon mes nesh o engjelli yne i bukur🙏❤”.
Ndërkohë, pas largimit nga jeta, Arben Delaj ka marrë dhe do të marrë vlerësime të shumta. Këshilli i Bashkisë Malësi e Madhe e ka nderuar me titullin “Qytetar Nderi”, në vlerësim të kontributit të tij për artin e kulturën në trevën ku lindi dhe u rrit.
Arben Delaj ishte këngëtari më i njohur i Malësisë së Madhe. Me zërin e artin e tij, ai depërtoi në të gjitha trevat shqipfolëse, brenda e jashtë kufinjve gjeografikë e shpirtërorë. Beni ishte i njohur për humorin e tij dhe batutat që i shtonin më shumë vlerat artistike. Ai ndërroi jetë 5 vjet më parë pas një ataku kardiak.
