Partia Republikane ka depozituar në Gjykatën Kushtetuese një kërkesë për vendimin e Ministrisë së Shëndetësisë për ndalimin e aktiviteteve dhe tubimeve politike.
Përmes kësaj kërkese kjo parti e cilëson të padrejtë këtë masë të vendosur nga Komiteti i Ekspertëve, që nuk lejon grumbullimin e më shumë se 10 vetëve në një ambient, në një kohë kur duhet të nisnin organizimet dhe takimet për nisjen e fushatës elektorale. Duke argumentuar këto pakënaqësi, PR e konsideron sjelljen e Komitetit të Ekspertëve me dy standarde, sa kohë që lejon punimet e Kuvendit, dhe nga ana tjetër ndalon grumbullimet e 10 apo më shumë personave.
Sipas PR-së, sjellja në raport me aktivitetet e opozitës është shumë e ndryshme në krahasim me ato që bën sot qeveria apo institucione të tjera në varësi të saj. Partia Republikane e mbyll shkresën duke kërkuar shfuqizimin e vendimit, pasi e cilëson si akt antikushtetues.
“Partia Republikane Shqiptare (kërkuesi), si parti politike e cila është aktualisht e angazhuar aktivisht në fushatën zgjedhore për zgjedhjet e përgjithshme parlamentare të datës 25 Prill 2021, si dhe partitë e tjera opozitare, dëmtohen rëndë nga akti objekt kërkese i cili ndalon specifikisht aktivitetin e këtyre partive dhe për pasojë vetë esencën e ekzistencën e tyre si parti politike.
Akti objekt kërkese pengon specifikisht, në mënyrë drastike, kërkuesin dhe partitë opozitare në përmbushjen e rolit të tyre Kushtetues si parti politike; pra si një faktor qendror i formimit të vullnetit politik të zgjedhësve. Për pasojë, akti objekt kërkese bie ndesh me parimet, të drejtat dhe liritë themelore të mbrojtura në Kushtetutën e Republikës së Shqipërisë si dhe në konventat ndërkombëtare të ratifikuara nga Shqipëria, ndaj si i tillë duhet të shfuqizohet”, thuhet në kërkesën e drejtuar pranë Gjykatës Kushtetuese.
