Këto mure janë të xhamisë së vjetër në Tophanë, e ndërtume në 1617. Mbas shkatërrimit që bani diktatura, kjo pjesë u la të përdoret si magazinë dhe për shitjen e vajgurit. Xhamia që u ndertu në 1996 i la ashtu si ishin, e disa vite ma vonë, xhemati i lagjes e ktheu si klasë për femijë këtë hapësinë.
Si mur 400 vjeçar, duhet të ishte Monument Kulture ma së paku, por për turpin e shumëkujt, përfshi këtij që po shkruan këto rreshta, kjo pjesë do prishet, për ti ba vend xhamisë së re, ekstravagante dhe pompoze.
Sepse dikush andej nga vendet arabe, ka lekët dhe don me ba një xhami me emër të njoftunve të vet, e në këtu nuk do i thojmë ma Xhamia Tophanë, por xhamia e XY -it.
Sepse dikush këtej e ka punë rutinë me prish të vjetrën e me ba të renë, me projekte tip, pa e kru radaken me nxjerr në dritë ndonjë gja të hajrit.
Sepse dikujt këtu, nuk i bahet punë ma shumë se me than okej, e Zoti jua shpërbleftë. Sepse shumëkush, thotë he pra, edhe këtë punë e banë. E dijnë se asht mur 400 vjeçar për monument kulture, por… he pra.
Ka një mpirje aq të fortë, saqë me than të rishikohet projekti, duket si me ken tu kërku revolucion.
Para do vitesh diskutoshim xhamiat i ndërtunë, inshalla po veprojnë me mend për xhematin e qytetin, por lemeria nuk ndalet, prishen ata që janë ba para do vitesh, për ti ba të reja. He pra.
LEXONI EDHE: “Portiku i vjetër integrohet me ndërtimin e ri”, Myftinia Shkodër reagon për ndërtimin e Xhamisë së Tophanës…
Prishet xhamia e Shabanit, Hasanit etj., prishet xhamia e njerëzve të lagjes, për ti ba vend emrit të dikujt tjetër, emër ma bashkëkohor, xhami ma moderne, xhami ma për hije, për me pre shirita ma të bukur. He pra.
Na hiqen emrat e vendalive, për ti vendos emra tjerë, prej diku larg, që Zoti ja shpërbleftë, por kam frikë se si me ble Krisjano Ronaldot, e si me ba xhamitë, nuk asht se ja bajnë shumë dallimin.
Kur shpinë nuk e don i zoti, nuk i ka faj lagjja. Ça nuk e prishi diktatura, me tan të zezat e veta, e prish kotësia sido tjetër që ti thush.
Me gjithë zemër, uroj që të rregullohet ai projekt, ta ruajnë e ta integrojnë siç i ka hije, këtë pjesë monumentale të xhamisë. Asht diçka shumë e lehtë me u ba, dhe aspak e vështirë. Vetëm duhet me dasht… /Nga Ardit MUÇA, publikuar në Facebook/
