Prefekti i ri i Qarkut Shkodër nis zyrtarisht punën me 1 prill 2019. Do të jetë ministri i brendshëm Sandër Lleshaj që do të bëjë prezantimin e Valdrin Pjetrit në detyrën e re, pasi ka lënë atë të drejtorit të përgjithshëm të Hipotekave. Lajmi bëhet i ditur nga Drejtoria e Policisë së Qarkut Shkodër, e cila në njoftimin për mediat shkruan: “Diten e hene, 1 Prill, ne ora 10:00, ministri i Brendshem S.Lleshaj do te prezantoje Prefektin e ri te Qarkut Shkoder, ne nje takim ku do te marrin pjese drejtues te Pushtetit Vendor dhe te Policise, te qarqeve Shkoder, Lezhe, Kukes e Diber.”.
Nuk është e qartë se pse është bërë kaq i zgjeruar ky prezantim, me përfaqësues edhe të qarqeve Lezhë, Kukës e Dibër kur prefekti që do të prezantohet, do të ketë kompetenca vetëm për qarkun e Shkodrës. Mbase ministri i brendshëm Lleshaj do ta shfrytëzojë rastin edhe për ndonjë takim të zgjeruar mbi situatën e rendit në Shkodër. Sipas gjasave, ditën e sotme do të bëhet edhe prezantimi zyrtar i drejtorit të ri të policisë së Shkodrës Niko Brahimaj, i cili u emërua me urgjencë mbrëmjen e të shtunës nga Lleshaj pas ngjarjes së rëndë ku ranë në pritë dy vëllezërit Bilali në Shkodër. Brahimaj do të zëvendësojë drejtorin Vehbi Bushati që u shkarkua.
