Nga Artan HOXHA, gazetar
Kjo që ka ndodhur sot në Shkodër me bashkëshorten e të vrarit Endri Mustafa, as nuk është parë dhe as është dëgjuar ndonjëherë. Pa u mbushur ende 24 orë nga zbulimi i kufomës së masakruar të burrit në periferi të qytetit, nëna e tre fëmijëve tashmë të mbetur jetimë, u detyrua të jap jo një, por dy konferenca shtypi.
Kjo nuk është e turpshme, kjo është ulëritëse. Pasi të rrëmbejnë ndërsa je në kërkim nga policia, të torturojnë, të masakrojnë, ta flakin kufomën si qen i ngordhur në Livadhe, të lënë fëmijët jetimë, të nxjerrin dhe bashkëshorten të mbajë konferencë shtypi pa iu tharë ende lotët…
Pamja e terrorizuar e bashkëshortes së Endri Mustafës, ndërsa përpiqej të justifikonte para mediave vrasësit e të shoqit, është fytyra e vërtetë e sigurisë në qytetin e Shkodrës tashmë të marrë peng nga krimi i organizuar…
Në këto kushte, që kjo grua e mbetur me tre fëmijë jetimë, të mos detyrohet të jap një konferencë të tretë shtypi për ndonjë tjetër grup kriminal në Shkodër, duhet që në mënyrë urgjente dhe të menjëhershme, Prokurori i Përgjithshem i Republikës dhe Drejtori i Përgjithshëm i Policisë së Shtetit, të marrin nën mbrojtje dhe ti ofrojnë siguri të plotë familjes së Endri Mustafës, në mënyrë që të mos mbetet peng e kriminelëve të paprekshëm prej vitesh në këtë qytet… /Publikuar në Facebook/