Këshilli i Bashkisë së Shkodres, do të zhvillojë nesër (të mërkurën, 5 janar 2022) mbledhjen më të rëndësishme të tij për këtë vit. Në këtë mbledhje do të shqyrtohet projektbuxheti për vitin 2022 dhe atë afatmesëm 2022- 2024.
Përmes një njoftimi për mediat, është mësuar edhe rendi i ditës i mbledhjes së Këshillit Bashkiak, ku pikë kryesore është pikërisht shqyrtimi dhe miratimi i projektbuxhetit për vitin 2022.
Sigurisht, në këtë mbledhje ka edhe disa pika të tjera me rëndësi për shkodranët, siç është edhe ai për taksat dhe tarifat vendore në Bashkinë e Shkodrës.
Mbledhja e Këshillit Bashkiak është paraprirë nga mbledhjet e komisioneve të tij për programet e veçanta të projektbuxhetit, ndërsa më herët janë zhvilluar dëgjesa publike me banorët në territor për të tërhequr opinionet e prioritetet e tyre.
Nga gushti 2019, Këshilli Bashkiak i Shkodrës përbëhet në shumicë absolute nga këshilltarë të PS- së ndërsa kryetarja e Bashkisë është përfaqësuese e PD- së. Pavarësisht kësaj, shpesh herë vendimmarrjet nuk janë ndikuar asnjëherë nga interesat politike por ato që Bashkisë së Shkodrës. Kështu pritet të ndodhë edhe në mbledhjen e datës 5 janar 2022, më e rëndësishmja për Bashkinë e Shkodrës dhe qytetarët e saj.
