Kallashnikovet ne Rinas, dalin detajet e reja per origjinen e “pakove”

Hetimet e Policisë së Shtetit për tri pakot me pjesë kallashnikovi që u zbuluan të enjten në Rinas, kanë zbuluar postën nga ku janë nisur.

Burimet thanë për “Panorama” se nga verifikimet ka rezultuar se, pakot e mbështjella në formë dhuratash janë postuar me DHL nga Durrësi, nga një person ende i paidentifikuar.

Për këtë arsye, grupi hetimor ka sekuestruar kamerat e sigurisë së kësaj agjencie, të cilat po verifikohet për të arritur në gjurmët e autorit, që ka shënuar një emër fiktiv në të tri pakot.

Pjesët përbërëse të armëve luftarake janë konstatuar pasditen e së enjtes, në kohën kur po kryhej skanimi i pakove postare të kompanisë “DHL”.

Në momentin që janë zbuluar, tek skaneri kanë qenë të pranishëm shërbimet e Policisë Kufitare, të Doganës së Rinasit dhe të kompanisë ICTS të sigurisë së aeroportit.

Kjo për shkak të masave shtesë të sigurisë që janë marrë së fundmi në Aeroportin “Nënë Tereza”, për shkak të planit antiterror, nisur nga sulmet e kërcënimet në disa vende të Europës.

Menjëherë pasi janë shfaqur pjesët e dyshimta, është bërë bllokimi i pakove dhe është kërkuar menjëherë prezenca e oficerëve të Antiterrorit.

Burimet thanë se ato janë sekuestruar në cilësinë e provës materiale, ndërsa është regjistruar procedim penal pa autor me akuzën “trafikim ndërkombëtar i armëve”, i kryer në bashkëpunim, i mbetur në tentativë./joq/