Maxhoranca akuzoi opozitën në Komisionin e Integrimit se me lojën e saj politike po pengon çeljen e negociatave. Kryetari i Grupit Parlamentar të PS, Taulant Balla, i kujtoi opozitës se nuk ka bashkëpunuar për çeljen e negociatave, ndërkohë theksoi se Xhafaj po godet aty ku dhemb më shumë për deputetët e PD.
“Jua them troç, që ju nuk keni kontribuar fare në këtë proces të rëndësishëm. Ku kemi komunikuar së bashku? Ne duhet të ishim bashkë sot në Holandë apo në Gjermani. Fatmir Xhafaj po ju godet atje ku ju dhemb shumë juve. Edhe Luli e di këtë punë. Sali Ram Berisha quhet regjisori i kësaj historie”, tha Balla.
Deputeti i PS-së, Musa Ulqini, deklaroi se përgjimi i publikuar nga PD është bërë në muajin tetor dhe u shfaq tani, kur shqiptarët presin çeljen e negociatave.
“Si ka mundësi që një kasetë që është bërë në tetor, u shfaq tani?! A ka mundësi që opozita edhe gjërat e këqija që nuk janë pak në këtë vend t’i marrë dhe t’ia çojë Kryeministrit edhe t’i thotë këto gjëra mi hiq se do t’i bëj publike. Sepse është një e mirë e të shqiptarëve që këto ditë të mbajmë gojën”, tha Ulqini.
Ndërkohë, deputetja e PD-së, Jorida Tabaku, deklaroi se opozita ka dhënë kontributin e saj në vazhdimësi për integrimin e vendit, por Shqipëria vijon të jetë peng i krimit. Sipas deputetes së PD-së, qeveria është dorëzuar në luftën kundër krimit, ndërkohë që opozita po vijon të luajë rolin e saj në shërbim të vendit.
“Shqipëria fatkeqësisht është peng i krimit, është peng i atyre që sot organizojnë trafikun e drogës. Unë e kuptoj që qeveria është dorëzuar, por ne si opozitë do të vazhdojmë të luajmë rolin tonë deri në fund”, tha Tabaku.
