Partia Socialiste në Shkodër, duket se paralelisht me zgjedhjet politike të 25 Prillit 2021, po punon edhe për zgjedhjet vendore. Kjo mësohet përmes një postimi në Facebook të koordinatorit për Qarkun Shkodër, Ilir Beqaj. Përmes një publikimi në Facebook, ai njofton një takim me këshilltarët socialistë në Këshillin Bashkiak të Shkodrës, ndërsa paralajmëron se zgjedhjet për kryetarin e Bashkisë janë s’afërmi.
“Takim me këshilltarët socialistë në këshillin bashkiak të bashkisë Shkodër. Në Shkodër përveç zgjedhjeve parlamentare të 25 prill 2021, s’afërmi kemi edhe betejën politike për zgjedhjen e kryetarit të bashkisë.”, shkruan Ilir Beqaj.
Nuk është e qartë nëse Beqaj e ka deklaruar për të karikuar këshilltarët socialistë në prag të zgjedhjeve politike, sepse datën e zgjedhjeve në Shkodër apo kudo, mund ta dekretojë vetëm Presidenti i Republikës, të paktën sipas Kushtetutës.
Presidenti Meta e ka lënë të kuptohet më shumë se një herë, se pa u shprehur Gjykata Kushtetuese për zgjedhjet e 30 Qershorit 2019, nuk do të shpallë asnjë datë zgjedhjesh të pjesshme apo të plotë vendore. Siç dihet, Gjykata Kushtetuese akoma nuk është plotësuar me 9 antarët e saj, ndërsa si afat për këtë është lënë fundi i muajit dhjetor. /ShkodraWeb Media/
