Ditën e sotme demokratët shkodranë votojnë për të zgjedhur kryetarin e ri të PD Shkodër. Në orët e para të këtij procesi, duket një fluks mjaft i lartë i pjesëmarrësve në vottim, i cili po kryhet në hollin e teatrit “Migjeni”.
Brenda këtij ambjenti, janë ngritur 4 komisione votimi, të ndara sipas germave nistore të emrave të zgjedhësve për të lehtësuar sa më shumë procedurën. Ndërkohë, në komisione ka përfaqësues të kandidatëve në garë.
Interesant është sistemi i identifikimit elektronik të votuesve. Pasi gjendet emri i tyre në listë, ata në ekranin e një laptopi kanë mundësi të vendosin me dorën e tyre firmën e vet ose një shenjë që ato e konsiderojnë të arsyeshme.
Siç dihet, fillimisht nga Komisioni i Përkohëshëm i Rithemelimit erdhi një listë me 9 kandidatura. Pak orë para nisjes së votimit, 5 nga kandidatët u tërhoqën nga gara. Në fletën e votimit sot, janë emrat e Arben Lushaj, Elvis Deda, Gjenarin Kapcari dhe Vildana Gushta.
Pas përfundimit të votimit në orën 18:00, pritet numërimi i votave. Fiton ai kandidat që ka marrë më shumë vota, pa patur nevojë për raund të dytë balotazhi. Me shumë mundësi, në orën 20:00 mund të njihet edhe emri i kryetarit të ri të PD Shkodër që do të pasojë Xhevdet Amulin në krye të selisë blu lokale. /ShkodraWeb/
Për bashkëpunime, publikime reklamash, njoftimesh në ShkodraWeb, mund të shkruani në SMS, Whatsapp, Viber +355 67 300 20 70 ose mail: info@shkodraweb.com në çdo kohë!
