Ky është momenti kur shtetasi shqiptar Bes Kondi, i konsideruar si hero nga mediat kanadeze, i jep ndihmën e parë një personi që ka mbetur i plagosur pasi është përplasur nga furgoni i një terroristi në Toronto. Kondi ishte personi i parë që u shfaq në kryqëzimin ku nisi akti terrorist dhe i dha ndihmën e parë një burri kanadez të plagosur, përpara se të vinte ambulanca.
Me të mbërritur ambulanca, Kondi e instruktoi këtë të fundit që të asistonin një grua të gjakosur aty pranë që ishte më rëndë, ndërsa vetë vijoi të ndihmonte burrin e plagosur. Kondi tha se kishte dalë menjëherë sapo kishte dëgjuar panikun e përhapur në zonë dhe se ai ishte i certifikuar në dhënien e ndihmës së shpejtë.
Ai punon si menaxher i ndërtesës në kryqëzimin ku nisi sulmi terrorist, që shkaktoi 10 viktima. Në foton në fjalë, shihet që Kondi është ulur në gjunjë dhe po ndihmon të lënduarin. Akti i të riut i bën të gjithë shqiptarët që të ndihen krenarë.
