“Erdha me autobus dhe eliminova Dinamo Bukuresht me golin tim”, Mirel Josa thumbon rumunët para ndeshjes…

Mirel Josa e sheh Vllazninë jo si skuadër favorite për kalimin e turit në Ligën e Konferencës përballë Universitatea Kraiovës. Por në konferencën për shtyp në Rumani para sfidës, ai ka bërë të qartë se çdo gjë mund të ndodhë tashmë në futboll dhe ka marrë shkas pikërisht nga e kaluara e tij si futbollist.

“Nuk mund të flas për gjendje të veçantë të futbollistëve. E para e punës jemi shumë të gëzuar që mbërritëm mirë, jemi të gëzuar që po çlodhemi mirë gjatë kësaj periudhe. Gjithashtu jemi shumë entuziastë sepse gjejmë këtu një stadium bashkëkohor. Kjo është kryesorja për ne, pastaj sa i përket gjendjes së lojtarëve e skuadrës, është një gjendje e njëjtë me para ndeshjes që luajtëm në Shkodër. Mund të them që është një gjendje optimale.


Mendoj se kishte dy tablo në ndeshjen e parë, një pjesë e parë ku skuadra udhëtuese e interpretoi mirë, u gjendëm në befasi për disa veprime që nuk ishin individuale, por funksionoi mirë si skuadër. Në pjesën e dytë ishte skuadra jonë, dua t’i jap vlera skuadrës time se pas shokut që pësuam pas minutës së 45, themi se skuadra nuk e vazhdoi këtë goditje që pësoi, por hyri me iniciativë tjetër në fushë, patëm ekuilibra më të mira në fushën e lojës sa i përket ndërprerjes së kundërsulmit kundërshtar.

Unë nuk mund të konfirmoj lëvizje, në mendjen time mund të bëhen, por nuk mund të konfirmoj. Jo sepse do të na njohë kundërshtari se e dimë që na shikojnë, por më tepër do të fokusohem te ndeshja e parë. Konfirmimet do t’i keni nesër para se skuadra të zbresë në fushë, po pres stërvitjen e fundit se të papriturat ndonjëherë të nxjerrin në konkluzione të padrejta.

Mua më intereson entuziazmi se të luash pa entuziazëm, atëherë ke ardhur të humbësh ndeshjen. Ndaj kryesorja është entuziazmi, të gëzojmë futbollin. Pres një Universitatea e cila do të rritet cilësisht në fushën e vet, mund të jetë cilësisht më lart. Ndaj na bie si detyrë të mos luajmë si në pjesën e dytë në Shkodër, por edhe më mirë.

Drejtuesit e Universitatea kanë të drejtë ta kërkojnë kualifikimin se kanë investuar shumë te kjo skuadër, është ekip me traditë. Unë futbollin rumun e kam prekur si futbollist në vitin 1986, kur ekipi im ka luajtur kundër Dinamos së Bukureshtit dhe atëherë ka qenë me shumë traditë. Përveç ekipit kombëtar kishte ekipe shumë të mira si edhe Steaua, ku shtohet edhe Univesitatea që i shkonte mbrapa, ishte edhe Rapidi. Edhe Universitatean e vë në rang të skuadrave të para dhe ka të drejtë të kërkojë kualifikimin, edhe unë të isha në vend të drejtuesve të Kraiovës do të kërkoja kualifikimin.

Futboll nuk ka me presion. Një skuader që të japë 100% e vet duhet të jetë e zhveshur komplet nga presioni, jo ajo që themi ne që të japë 120%. Lojtarët duhet të jenë të fokusuar që të japin mundësitë e veta, dhe mundësitë e veta janë 100%, jo 120%.

Për çdo skuadër, tifozët janë moral, vlerësohen nga djemtë që janë brenda për brenda për këtë udhëtim që kanë bërë. Është pozitive për skuadrën jo vetëm këtë ndeshje, por është pozitive që Vllaznia tregon që ka tifozë që e dashurojnë skuadrën dhe mua më jep prioritet të punoj edhe me bashkëpunimin e tyre sa i përket vazhdimësisë së skuadrës. Pasi ne përveç Europës na pret një malore shumë e madhe se të gjithë kërkojnë më të mirën sa i përket skuadrës tonë.

Kualifikimi? Nëse mendojmë këtë, do të jemi shumë të gabuar. Të shohim çfarë do të bëjmë dhe dita nesër në darkë do të sjellë në konkluzione se çfarë bëmë. Nuk duhet të mendojmë në fillim për kalimin e turit, duhet të jemi me këmbë në tokë duke vlerësuar në maksimum kundërshtarin.

Futbolli është i çuditshëm, është një sport ku kemi parë të gjithë të papriturat, si nga krahu pozitiv, ashtu edhe negativ. Do të jemi shumë me këmbë në tokë e japim mundësitë tona. Nëse futbollistët janë entuziastë dhe japin mundëistë e tyre, nuk kam çfarë u kërkoj më tepër.

Udhëtimi si alibi? Nuk ka alibi. Këto ishin kushtet e udhëtimit tonë. Duhet të kemi parasysh që do i futem pak historisë në këtë drejtim. Në vitin 1986, skuadra ime ka luajtur kundër Dinamos së Bukureshtit dhe luanim në Kupën e Kupave dhe ishte turi i parë. Ju e keni shumë mirë parasysh nivelin e Dinamos së Bukureshtit në atë kohë. Ka pasur 9 lojtarë në ekipin kombëtar dhe trajner ishte Mircea Luçesku. Dhe skuadra jonë nuk kishte pretendime për t’u kualifikuar, duke ditur nivelin e kësaj skuadre. Por qëlloi, ndaj e them që futbolli është shumë i çuditshëm, dhe fituam në Tiranë 1-0 me një gabim të portierit dhe kemi ardhur pa asnjë lloj pretendimi. Jemi nisur nga Tirana me autobus dhe me çfarë autobusi! Nuk ka nevojë t’ua them. Kemi fjetur një natë në Sofje, kemi kaluar kufirin në një vend me lumë afër, kemi ardhur në Bukuresht të hënën, kemi fjetur në hotel “Nacional”. Kemi luajtur pas dy ditësh, të mërkurën dhe kemi fituar ne 2-1. Prandaj që këto problemet e udhëtimit nuk janë asnjë gjë.

Nëpërmjet kësaj konference, duke respektuar edhe skuadrën e Universitatea dhe futbollin rumun, dua të përfundoj duke përmendur dy shokët e mi shumë të mirë të cilët nuk e di se çfarë bëjnë në këto momente, flasim për Andone dhe Redniç. Të cilët gjatë kohës që ne erdhëm e luajtëm me ekipin kombëtar në Konstanca pas 3 vitesh, në ato dy javë që qëndruam atje se u stërvitëm atje, na ndihmuan shumë në jetesën tonë në atë qytet. Në atë kohë në radhët e kombëtares rumune kishte filluar të luante edhe George Haxhi. Unë nuk luaj më futboll, por golin e dytë në Bukuresht e kam shënuar unë. Kjo nuk do të thotë që nuk do të shënojnë këto nesër se nuk luaj unë. Kjo ishte vetëm për shaka dhe për të kuptuar gjërat. Futbolli ka ndryshuar shumë dhe unë i uroj qoftë lojtarëve të Universitatea, ashtu edhe lojtarëve të mi të bëjnë një futboll duke dhënë 100% në këtë ndeshje.

Për ne është normale që është favorite skuadra rumune, por futbolli është shumë i çuditshëm dhe varet se sa do ta respektosh futbollin. Duhet ta respektosh futbollin që të marrësh frytet e duhura”, tha Josa.