“Kraiova vitin e shkuar ishte favorit, por u eliminua nga një ekip shqiptar”, Gurishta: Ja çfarë u premtoj tifozëve…

Vllaznia do të kërkojë mrekullinë ditën e nesërme në duelin e kthimit ndaj Krajovës në Rumani. Pas barazimit 1-1 në “Loro Boriçi”, shkodranët do të tentojnë gjithçka për gjithçka në transfertë. Në prag të këtij dueli, në konferencën për shtyp në krah të trajnerit Mirel Josa, ishte kapiteni, Erdenis Gurishta, që ndër të tjera u shpreh:

“Nesër e parashikoj ndeshje të vështirë. Sa i përket lojtarit të rrezikshëm, mund të them me pastërti se krahu i majtë i tyre është pika e fortë e kundërshtarit. Duke pasur parasysh dy lojtarët e krahut të majtë, janë lojtarë të kombëtares, por gjithsesi ky fakt s’më tremb aspak.

Unë jam në krahun e djathtë dhe do të jap maksimumin dhe kjo më motivon më shumë për të dhënë 100 përqind në fushën e lojës.

Do të thoje “PO” në qoftë se të vinin oferta nga Rumania? Superliga rumune normalisht që është më e fortë se ajo shqiptare. Dy vitet e fundit u afruan dy lojtarë si Batha dhe Hoxhallari. Jam lojtar nën kontratë. Kam edhe 1 vit kontratë. Të ardhmes s’i dihet.

A ke biseduar me ndonjë nga ekipi i Laçit? Jo s’kemi pasur ndonjë arsye pse të flasim me lojtarët e Laçit.. E kemi ndjekur ndeshjet e vitit të shkuar. Dhe me këtë domethënë nuk ka asnjë favorit. Kraiova vitin e shkuar ishte favorit, por u eliminua nga një ekip shqiptar.

Shansi i jonë këtë vit ishte që kaluam direkt në turin e dytë. Turin e parë do e kishim pasur detyrim ta kalonim. Nuk kemi presion, e dimë nivelin e kundërshtarit që na ka rënë. Nuk mund të jepja një premtim për kualifikimin, por premtoj që do të japim maksimumin dhe do të dalim me kokën lartë. Në futboll nuk i dihet, mund të ketë edhe kohë shtesë, ne jemi përgatitur për çdo situatë”, u shpreh Gurishta.