Një lajm i trishtë është mësuar ditën e sotme. Një emër i njohur i artit dhe muzikës shkodrane, është ndarë nga jeta. Në moshën 68 vjeçare është shuar Ferdinand Dedaj, këngëtar dhe muzikant mjaft i njohur.
Lajmi është dhënë në rrjete sociale nga të afërmt të të ndjerit, që shprehin dhimbjen e natyrshme për ndarjen nga jeta të Nandit, siç e thërrisnin me përkedhëli të afërmit e miqtë.
Pushofsh në paqe, Nandi i dashur! Iu bashkove të shumëve në Qiell, për të mos u harruar kurrë! Do të kujtojmë për gëzimin që na fale në jetë, me zërin, me humorin dhe gjithçka që lidhi familjet dhe të afërmit tanë, me respektin dhe dashurinë e pafund për njëri- tjetrin, si amanetin e prindërve tonë!
Është e njëjta datë, ashtu si 15 vjet më parë… Rastësi e çuditshme!!! Ja, sot jeni përsëri bashkë! Paçi driten e pashuar e pushimin e pasosur! Do më mungosh, Nandi, djali i hallës sime të ndjerë, Vitores!”, shkruan në rrjete sociale një nga të afërmet e Nandit.
Nandi mori pjesë në Korin e Shtëpisë së Kulturës Shkodër, sot Qëndra e Kulturës “Pjetr Gaci”. Ishte ndër të parët këngëtarë që themeluan grupin “Karajfilat që ka Shkodra”, mori pjesë për vite me radhë në Korin “Dom Mikel Koliqi” të Katedrales dhe ishte pjestar aktiv që me krijimin e korit të Shoqatës “Rozafa Ekspresion”.
Ferdinand Dedaj ka shënuar emrin e tij si një ndër antarët themelues të grupit të mirënjohur “Karajfilat që ka Shkodra”, i cili ka qenë mjaft aktiv dhe i dashur nga artëdashësit. ShkodraWeb i shpreh ngushëllime familjarëve, të afërmëve, miqve dhe kolegëve të të ndjerit.
