Një 14-vjeçare nga qyteti i Fierit ka rënë nga dritarja e shkollës Liri Gero dhe për pasojë ka thyer vertebrën e shtyllës kurrizore.
Klea Metaj ka hipur në parmakun e dritares për të marrë stilolapsin, por në atë moment i ka rrëshqitur dora dhe ka rënë, sipas familjarëve.
Ngjarja ka ndodhur ditën e enjte më datë 18 janar, ndërsa familjarët shkruajnë në redaksinë e JOQ.al duke apeluar për ndihmë.
Kjo pasi gjendja e vajzës është me të vërtetë e rënduar dhe atyre iu nevojiten vida për të bërë të mundur ndërhyrjen në shtyllën kurrizore.
Ata shkruajnë se vidat gjenden vetëm në mënyrë private dhe kushtojnë 2800, por nuk kanë mundësi për asgjë, pasi janë në kushte të vështira ekonomike.
Një familjare shkruan:
Ju lutemi është një rast urgjent. Mbesa ime ka rënë nga dritarja e shkollës dhe është 14 vjeçe. Ajo ka thyer një vertebër të shtyllës kurrizore dhe po mbahet me qetësues në spitalin ushtarak prej 3 ditësh. Kjo pasi familjarët nuk kanë mundësi që të bëjnë ndërhyrjen pasi vidat kushtojnë 2800 euro dhe blihen në rrugë private. Ju lutem mund ta publikoni që sado pak të na ndihmojnë./joq/