Vllaznia mund Skenderbeun në Korçë, futbollistët përfitojnë premion e vendosur nga sponsori

Vllaznia futet këtë sezon me një projekt të ri dhe në dukje pa shumë pretendime, mirëpo në fakt, fusha e lojës po shfaq një skuadër të ndërtuar mirë, lojtarë që njihen si duhet në fushë me njëri-tjetrin dhe një skuadër që funksionon.


Edhe pse është shpejt për të dalë në konkluzione, 180 minutat e para të Superiores i kanë dhënë me meritë vendin e parë, pa harruar se ka luajtur kundër skuadrës së ngjitur rishtas në Superiore, Apolonia, si dhe Skënderbeu, këtë sezon me djem të rinj.

Mësohet se për skuadrën kuqeblu, dje ka pasur edhe një shpërblim motivues. Shpesh fanella është shumë e rëndë, dhe kur vjen puna te Vllaznia, ajo peshon vërtetë, mirëpo, drejtuesit kanë menduar edhe për një motivim ekstra. Gazeta ka mësuar se për fitoren e djeshme, Vllaznia ka pasur një premio prej pesë milionë lekësh (të vjetër). Premio është premtuar nga sponsori Alban Xhaferi në rast fitoreje në Korçë.

Për futbollistët, festa e kreut, e 2 fitoreve radhazi (tre bashkë me Kupën), janë shoqëruar edhe me një shpërblim monetar. Mesa duket, në Shkodër kanë nisur gjithçka si duhet dhe gjërat po shkojnë për mrekulli.

ShkodraWeb Channel