“Nuk kemi dyshime tek asnjeri prej fiseve, as Lict e as Bajrajt”, kështu është shprehur Ingrid Mustafa, bashkëshortja e 32 vjeçarit Endri që u gjet i pajetë në zonën e Livadeve në Shkodër. Pasi ka dhënë intervistën e parë, ajo ka kërkuar sërish vëmendjen e mediave për të sqaruar edhe pozicionin e familjes Mustafa lidhur me lajmet që vijnë për përfshirje të fisit Bajraj në këtë ngjarje.
Bashkëshortja e 32- vjeçarit ka saktësuar se nuk kemi dyshime për askënd. Madje, ajo i ka bërë thirrje publike Prokurorit të Përgjithshëm Olsian Çela të zbardhë ngjarjen. Mustafa ka thënë se të vertetën e di vetëm personi me të cilin ka dalë natën Endri, person që sipas saj, policia e ka liruar.
Gruaja ka thënë se mediat po japin shumë informacione, të cilat nuk janë të sakta, lidhur me ngjarjen e rëndë. Ajo ka kujtuar se nuk është dita sot për të dalë para mediave, por janë të detyruar nga fjalët që po na vijnë lidhur me ngjarjen.
“Janë duke na ardhur lajme, jua ka bërë njëri fis apo ua ka bërë fisi tjetër. Na ka marrë fisi i Bajrave edhe na kanë thënë “ne nuk kemi lidhje me ngjarjen”. Të jeni të sigurt, ata nuk e kanë bërë këtë punë. Mediat janë duke na hapur fjalë shumë. Ne nuk e dimë kush e ka bërë dhe unë e thashë edhe më përpara. Djali që rrin pas shtëpisë tonë, vetëm ai e di kush e ka bërë. Ai ka dalë vetëm me të.
Policia nëse do ta zgjidhi e zgjidh vetëm me atë djalë, nuk zgjidh gjë as me njërin fis as me tjetrin, se ne nuk kemi patur marrëdhënie me asnjërin prej fiseve. Kjo puna se është vrarë për njërin fis apo për fisin tjetër, kjo nuk është e vërtetë. Janë tu na hap fjalë shumë dhe kjo nuk është drejtë. Policia dhe kryeprokurori Olsian Çela ta gjejnë se sa për fiset asnjëri prej tyre nuk ka lidhje me atë ngjarje”, shprehet Ingrit Mustafa.
