KF Vllaznia aktualisht është jashtë objektivit të fillimit të sezonit, të paktën për Supërligën. Synimi i kuqebluve ishte renditja në 4 ekipet e para, të cilat do të diskutojnë titullin në epilogun e Supërligës në “Final Four”.
Situata nuk është aspak e mirë dhe opinioni sportiv, tashmë pret fitoren e kthesës në ndeshjen me Dinamon pasdreken e të dielës, në orën 17.00 në “Loro Boriçi” të Shkodrës.
Si zakonisht, 24 orë para ndeshjes, ka dalë para mediave trajneri i Vllaznisë Qatip Osmani, i cili aktualisht është në një situatë aspak të qetë dhe me presion jo vetëm nga tifozeria por 4edhe stafi drejtues.
Një problem jo i vogël mbetet edhe “ftohja” e tifozëve, të cilët janë larguar thuajse plotësisht nga mbështetja e ekipit. Megjithatë, klubi shkodran vazhdon të publikojë çmimet e biletave me synim mbështetjen e ekipit nga tifozeria, në një moment aspak të lehtë të Supërligës për kuqeblutë.