Hapësirat publike në pedonalen “Kolë Idromeno” janë liruar ditën e sotme. 17 subjekte, të njoftuara sipas ligjit, kanë bërë sot çmontimin dhe largimin vullnetar të elementëve që zinin hapësirat publike. Aty ku nevojitej, Bashkia Shkodër ka asistuar subjektet me mjete të nevojshme dhe punëtorë.
Lirimi i hapësirave publike do të pasohet me larjen dhe dezinfektimin e të gjithë sipërfaqes së pedonales, duke krijuar kushte optimale për qytetarët por edhe vizitorët vendas e të huaj.
Kryeinspektori i IMT- së Bashkia Shkodër Getian Ibro, bën me dije se situata do të monitorohet në vijimësi edhe pas përfundimit të aksionit. Në raste se do të ketë individë që do të tentojnë të rikthejnë zënien e hapësirave publike, do të përballen me ligjin, ka shtuar Ibro.
