Një burrë shqiptar që jeton në Southgate, Michigan mund të detyrohet të lërë gruan e tij të sëmurë dhe fëmijët sepse qeveria amerikane po e deporton, rrëfen familja e tij për mediat lokale. Flora Rranxburgaj vuan nga skleroza e shumëfishtë dhe kohët e fundit ka pësuar një goditje.
Ajo nuk mund të lihet e vetme pasi nuk mund të kujdeset për veten, por ajo ka një burrë besnik, Ded Rranxburgaj, i cili gjithmonë kujdeset për të. “Unë punoj dhe përpiqem të kujdesem për familjen time. Gruaja ime është shumë e sëmurë”, tha Ded Rranxburgaj.
Ai bën dy punë për të mbështetur familjen e tij dhe për të paguar për kujdesin mjekësor të gruas së tij. Ai dhe dy djemtë e tij, një që është në kolegj dhe një tjetër që është 14 vjeç, ndihmojnë gruan e sëmurë të bëjë gjithçka.
Megjithatë, Ded Rranxburgaj kohët e fundit shkoi në një takim me zyrtarët e emigracionit, dhe djali i tij thotë se ata i dhanë lajme të tmerrshme.
“Ata i kishin thënë ‘Ti duhet të largohesh për tre muaj”, tha Eric Rranxburgaj, djali 14-vjeçar i çiftit.
Zyrtarët e emigracionit thonë se Flora Rranxburgaj do të lejohet të qëndrojë në Shtetet e Bashkuara për momentin, sepse ajo është shumë e sëmurë për të udhëtuar, por Ded Rranxburgaj është urdhëruar të bëjë plane për të ikur në janar.
“Ai pritet të lërë gruan e tij të vdesë e vetme dhe të lërë djalin e tij 14-vjeçar, i cili është një qytetar amerikan, i lindur dhe i rritur këtu”, tha avokati i familjes George Mann.
Çifti thotë se ata erdhën në Shtetet e Bashkuara, pasi ikën nga një qeveri komuniste në Shqipëri që nuk do t’u lejonte atyre të praktikonin besimin e tyre katolik. Ata kërkonin azil.
Pas përmirësimit të kushteve në Shqipëri, ata u refuzuan për azil, por zyrtarët i lejuan familjes të qëndronte për arsye humanitare për shkak të sklerozës së shumëfishtë të Flora Rranxburgaj.
“Unë vetëm qaj dhe qaj dhe qaj”, tha Flora Rranxburgaj. “ Burri kujdeset për mua prej shumë vitesh. Ai është një burrë i mirë, një baba i mirë “.
Avokati Mann thotë se zyrtarët ende mund të vendosin të lejojnë Ded Rranxburgajn të qëndrojë në vend. Ai shpreson që njerëzit të ndjehen të prekur nga historia e familjes dhe të arrijnë tek senatorët dhe përfaqësuesit e tyre.
“Është shumë frustruese sepse nuk di ç’të bëj nëse babai nuk është këtu”, tha Eric Rranxburgaj.
Familja thotë se po luten për ndihmë dhe shpresojnë për mëshirë.
