Kryeministri Edi Rama i pranishëm sot në Kukës, në kuadër të turit “Bashkia që duam”, u prit me protesta nga qytetarët. Pas përfundimit të takimit me qytetarët, kreu i Bashkisë së Kukësit, Bashkim Shehu, tha se fjalimi i Ramës tregoi degradimin e tij, ndërsa i bëri thirrje kryeministrit të largohej.
“Pamë që si kryeministri prapë vazhdoi me shprehjen e tij të famshme, tha derrat, ai nuk e di se asnjëherë nuk janë rrit derrat në Kukës. Kjo tregon degradimin e kryeministrit. Më thanë që ishte marrë edhe me spitalin e Kukësit, Bashkia ka dërguar disa shkresa se aty po ndërtohet një ndërtesë. Jemi të hapur për investime në aeroport, por ai është i Kukësit. Jemi kundër grabitjes së pronave të kuksianëve. E ftoj Edi Ramën të ikë me qetësin më të madhe sepse çdo dalje tregon degradimin e tij. Ne jemi kundër kësaj qeverisje”, tha Shehu.
Ndërsa Rama përmes një postimi në “Twitter”, i është përgjigjur kryebashkiakut të Kukësit, ndërsa e ka cilësuar atë qesharak për faktin që i ka zënë rrugën me administratën.
“Një kryebashkiak qesharak i një partie qesharake del e zë rrugën e Kukësit me administratën, në vend se të ishte me mijëra qytetarët kuksianë në çeljen e punimeve të aeroportit ndërkombëtar!Merren me prita rrugësh në shekullin e XXI e pastaj duan vota nga ky popull?Oh ç’derexhe!”, shkruan Rama.
