Ngjarja e rëndë e ndodhur sot në Shëngjin, ku një i ri ka humbur jetën pasi ra nga lartësia e një objekti shumëkatësh në ndërtim, është kronikë e zezë e paralajmëruar prej kohësh, por e lënë me dashje të ndodhë si nga subjektet ashtu dhe nga institucionet.
(Duke mos para-gjykuar rastin konkret deri në konkluzionet e ekspertëve dhe hetimit), duhet të pranojmë se realiteti në Lezhë është i qartë dhe shqetësues:
-moszbatim i kushteve të detyrueshme të sigurisë në punë nga subjektet ndërtues, si dhe
-neglizhencë me dashje e verifikimeve dhe ndjekjes me rigorozitet të çdo rasti nga institucionet përgjegjëse: Inspektoriati Shtetëror i Punës, IKMT dhe Inspektoriati vendor i mbrojtjes së territorit pranë Bashkisë Lezhë.
Sektori i ndërtimeve, prej kohësh është kthyer në një arenë të fortësh në Lezhë dhe mundësi e politikës qeverisëse dhe drejtuesve lokalë për të bërë nderat para apo pas zgjedhore. Dhe pikërisht aty ku implikohen interesat, jo rrallë edhe të paligjshme e përtej kapacitetit financiar të arsyeshëm të çdo investitori e ndërtuesi, jeta e shëndeti i njerëzve të thjeshtë e të ndershëm, vlen pak e aspak.
Në mbledhjen e fundit të Këshillit të Bashkisë, ndër të tjera u pretendua se “Shëngjini është një zonë urbanë që po zhvillohet në mënyrë të disiplinuar”.
Por, faktet dëshmojnë krejtësisht të kundërtën:
Ngutje me ndërtime, shumëkatëshe, në qendra të banuara apo frekuentuara, që kryhen pa respektuar asnjë kriter bazë, kushtet teknike të sigurisë për punëtorët dhe kalimtarët, qytetarë që pretendojnë se edhe ndërtimet pa leje po lulëzojnë në Shëngjin, si dhe themele godinash shumëkatëshe që kanë zaptuar edhe metrin e fundit të trotuareve në zonën bregdetare të Kunes tashmë.
Nuk ke ku vë këmbën, e jo më të fshehësh kokën !!
Për të shmangur ngjarje të tjera tragjike si e sotmja, u bëj thirrje institucioneve përgjegjëse, Inspektoriatit Vendor të Punës, IKMT, IVMT, Bashkisë Lezhë :
-Të verifikojnë ligjshmërinë e çdo ndërtimi në proces në territorin e Bashkisë Lezhë.
Të pezullojnë çdo ndërtim në Lezhë deri në plotësimin e dokumentacionit, përmbushjen e të gjitha kushteve teknike për sigurinë e detyrueshme në punë.
-Ndërkohë, Prokuroria , duhet të hetojë dhe zbardhe rrethanat e ngjarjes dhe përgjegjësitë.
Me trishtim, shpreh ngushëllimet familjes së të ndjerit Emiljano, jeta e të cilit u ndërpre në lule të rinisë, në punë, në përpjekje për të jetuar me dinjitet, në vendin që ofron pak e aspak mundësi !! /Nga Alfrida MARKU, kryetare e PD Lezhë/
