Pas 7 Marsit të mësuesve, Bashkia Malësi e Madhe ka organizuar një aktivitet zyrtar edhe për Ditën Ndërkombëtare të Grave, 8 Marsin. Në sheshin para bashkisë, ishin ftuar gra dhe vajza me kontribute publike të spikatura në fusha të ndryshme.
Disa nga të pranishmet që kanë marrë fjalën, kanë falenderuar organizatorët për aktivitetin, duke shprehur vlerësime për nismën e ndërmarrë. Ndërkohë, kanë uruar gratë e tjera për këtë festë, e cila në Shqipëri ka një ndjeshmëri të madhe.
Në përshendetjen e tij kryebashkiaku Tonin Marinaj ka vlerësuar rolin e grave në shoqëri. Ai ka thënë se tashmë në çdo sferë të jetës ka një barazi në angazhimin e tyre mes grave dhe burrave. Madje, ka thënë Marinaj, gratë në shumë pozicione, janë më të aftë se burrat.
Në mbyllje të takimit, kryetari i Bashkisë Malësi e Madhe Tonin Marinaj, ka shpërndarë lule për gratë e vajzat e pranishme, si një vlerësim për kontributin e tyre në familjet malësore dhe në fushat ku ato kontribuojnë.
