Bashkia e Shkodrës ka nisur pastrimin e rrugëve të qytetit nga prania e reshjeve të breshërit të pazakontë në orët e para të ditës së sotme. “Në disa rrugë të qytetit të Shkodrës, reshjet intensive të breshërit kanë krijuar probleme në qarkullimin e mjeteve mëngjesin e sotëm. Menjëherë, ka nisur puna për pastrimin e rrugëve, ndërsa u bëjmë thirrje pronarëve të bizneseve, të pastrojnë trotuaret para njësive të tyre tregtare për të lehtësuar edhe lëvizjen e këmbësorëve.”, lexohet në një publikim të Bashkisë së Shkodrës në faqen zyrtare në Facebook.
Dita e djeshme ka qenë një ditë me paqendrueshmëri moti në rajonin e Shkodrës. Gjatë ditës ka patur reshje por edhe kthjellime. Në orët e para të ditës së sotme, është rikthyer edhe një fenomen i radhë atmosferik, siç është breshëri. Rreth orës 02.00 të mëngjesit të sotëm, kanë nisur reshje të forta shiu dhe breshëri, të cilat kanë sjellë në pak minuta edhe “zbardhjen” e rrugëve të qytetit.
Në disa rrugë të qytetit, trotuaret kanë gdhirë të zbardhur nga breshëri. në Pamje të parë, të kujtojnë pamjet e borës në rrugët e Shkodrës gjatë stinës së dimrit. Sipas informacioneve të para, breshëri ka shkatuar dëme të konsiderueshme edhe në kulturat bujqësore. Në trotuaret e qytetit, shihen gjethe pemësh të rëna përtokë, si pasjë e forcës dhe madhësisë së breshërit. Fenomeni i mëngjesit të sotëm, nuk mbahet mend në Shkodër asnjëherë.