Ish-zv.presidenti i Asamblesë Parlamentare të Këshillit të Europës, njëherësh themeluesi i Partisë Demokratike, Aleksandër Biberaj ka folur sot për herë të parë në një protestë të opozitës para Parlamentit. Biberaj i cili u largua nga FRD-ja e Bamir Topit për t’u rikthyer sërish në PD, tha sot gjatë protestës se Shqipëria është në udhëkryq, dhe se zgjidhja e vetme është opozita e bashkuar. Ish-deputeti i PD-së tha sot se opozita ka aleatë qytetaret, ndërkohë që Kryeministrit Rama i ka mbetur si aleancë vetëm e shkuara komuniste mes Beogradit dhe Moskës.
Sipas tij, opozita po përgatit programin e ri për zgjedhjet që janë shumë afër, ndërkohë që kauza e opozitës do të mbështetet më fort nga faktori ndërkombëtar.
“Opozita po përgatit programin e ri për zgjedhjet e ardhshme që do të jenë shumë afër. Ka shpresë që ky vend behet. Është përgjegjësia jonë dhe e opozitës”, tha Biberaj, i cili shtoi se: “Shumë shpejt faktori ndërkombëtar do të mbështesë kauzën tonë të drejtë”
