SHPENZIME/ Deputetet qe kane nxjerre me shume para per udhetime e hotele jashte vendit

Udhëtimet e deputetëve jashtë vendit, gjatë gjashtëmujorit të parë të vitit 2017, duke përfshirë bileta avioni, hotele, dieta, dreka dhe darka, u kanë kushtuar 13 341 516 lekë taksapaguesve shqiptarë. Shqiptarja.com zbardh 34 emrat e deputetëve që kanë udhëtuar jashtë vendit gjatë periudhës janar-korrik 2017, me paratë publike si dhe shpenzimet për secilin ligjvënës.
Në krye të listës, sa i takon kostos së vizitave jashtë vendit, ndoshta edhe për shkak të pozicionit të tyre në raport me marrëdhëniet me jashtë, qëndrojnë deputetët Namik Dokle me 1 119 563 lekë të shpenzuara, i ndjekur nga Arta Dade me 1 917 933 lekë të shpenzuara, Valentina Leskaj me 1 330 563 lekë të shpenzuara, Pandeli Majko me 820 504 lekë, Ilir Meta me 771 431 lekë, Luljeta Arapi me 576 950 lekë, Jozefina Topalli me 561 317 lekë të shpenzuara nga paratë publike, Anastas Angjeli me 525 712 lekë etj.
Shpenzimet për hotele
Sipas dokumentacionit, deputetja e Partisë Demokratike, Albana Vokshi, për gjashtëmujorin e parë të vitit 2017, gjatë vizitave jashtë vendit, ka shpenzuar 498 euro për akomodim në hotel. Ndërsa deputetja Arta Date ka shpenzuar 3 229 euro për akomodim në hotele gjatë vizitave jashtë vendit. Edhe deputetja Edlira Cerkezi ka shpenzuar 405 euro për fjetje në hotel, ndërsa deputeti demokrat Eduard Selami ka shpenzuar 495 euro. Deputetja Esmeralda Shkjau ka shpenzuar 111 euro, kreu i Partisë Republikane Fatmir Mediu ka shpenzuar 365 euro, deputeti Fatmir Toçi 2342 euro, ndërsa deputeti Gentian Bejko 352 euro. Lista vijon me Jozefina Topallin, e cila ka shpenzuar për fjetje në hotele 1340 euro, Klodiana Spahiu 492 euro, Luljeta Arapi 1143 euro, ndërsa Majlinda Bregu 532 euro. Deputeti i Partisë Socialiste Namik Dokle ka shpenzuar 1 582 euro, Pandeli Majko 1 567 euro, deputeti i LSI Përparim Spahiu 660 euro, Valentina Leskaj 1455 euro dhe Xhemal Qefalia 660 euro.
Shpenzimet për bileta udhëtimi
Deputeti Namik Dokle ka shpenzuar më shumë para për bileta udhëtimi jashtë vendit, rreth 10 mijë USD në harkun kohor të gjashtë muajve. Më pas vjen, Arta Dade me 1 102 409 lekë të shpenzuara për bileta udhëtimi. Deputetja Valentina Leskaj ka shpenzuar 809 859 lekë për bileta, ndërsa Anastas Angjeli 478 252 lekë. Esmeralda Shkjau ka shpenzuar 235 390 lekë, Edi Paloka 141 363 lekë, Klodiana Spahiu 210 588 lekë, Luljeta Arapi 311 229 lekë, Xhemal Qefalia 122 889 lekë etj.