“Po, e pashë babin, e pashë, ishte babi”. Këto janë fjalët që përsërit herë pas here në sy të mjekëve në spitalin Desio, djali 5 vjeçar i shqiptares që u vra dje me thikë nga i shoqi maroken në Itali.
I vogli duket se ka parë gjithçka, nga marrja e thikës së të atit, e deri tek qëllimi disa herë i së ëmës.
Viktima e kësaj ngjarjeje të rëndë është 33-vjeçarja Fjoralba Nonaj, e cila kishte marrë plagë të shumta në brinjë, bark e qafë, nga goditjet e të shoqit. Në përpjekje e sipër për të mbrojtur veten, sipas mediave italiane, ajo i ka lënë bashkëshortit shenja në pjesën e gjoksit dhe të krahëve.
Fill pas kryerjes së aktit makabër, burri ka dalë nga shtëpia, duke lënë vetëm të birin me kufomën e të shoqes dhe është dorëzuar në stacionin më të afërt policor, 5 minuta larg banesës së tyre.
Të parët që janë munduar t’i japin ndihmë dhe të shpëtojnë Fjoralbën, kanë qenë fqinjët e saj, të cilët edhe kanë larguar fëmijën 5 vjeçar nga skena makabre e krimit dhe po kujdesen për të në spital.
33-vjeçarja me origjinë nga Shqipëria, rreth 5 vite më parë ishte martuar me një maroken. Si pasojë e martesës kishte ardhur në jetë fëmija i tyre.
Fjoralba punonte si pastruese, por prej kohësh, marrëdhënia me të shoqin nuk po funksiononte. Ajo kishte kërkuar të ndaheshin dhe ai ishte detyruar të largohej nga banesa ku jetonin të tre, e të shkonte tek disa miq.
Prej rreth një muaji të dy nuk jetonin bashkë, deri ditën e djeshme, rreth orës 16:00, kur marokeni kishte shkuar për të parë të birin dhe në sherr e sipër me të shoqen, ka nxjerrë thikën e bukës dhe e ka vrarë atë në sy të fëmijës.
