Më në fund ka ardhur momenti i shumëpritur edhe për të. Mjeku i njohur sportiv shkodran Zyhdi Çoba është vlerësuar me titullin e lartë “Mjeshtër i Madh” nga Presidenti i Republikës, Ilir Meta.
Çoba ka qenë pjesë e dekorimit të gjashtë mjekëve të njohur sportivë të cilet i kanë kushtuar jetën e tyre kësaj fushe duke dhënë një kontribut të jashtëzakonshëm në zhvillimin e tij.
Padyshim që mjeku Çoba e ka merituar një vlerësim të tillë sepse ka 63 vjet që jep kontribut për sportin dhe nuk ka ndër mend të ndalet asnjëherë.
Motivacioni i Presidentit të Republikës në titullin e akorduar për të është: “Në shenjë vlerësimi për kontributin e çmuar në mjekësinë sportive, si mjek me skuadrën e futbollit ‘Vllaznia’ dhe Ekipit Kombëtar. I dalluar për profesionalizmin e tij në dobi të rritjes dhe përmirësimit të shëndetit të sportistëve cilësorë”.
PUBLIKIMI NË FACEBOOK I PRESIDENTIT TË REPUBLIKËS
Me anë të një ceremonie solemne, pata sot nderin të vlerësoj një buqetë mjekësh të dalluar të sportit shqiptar, doktorët Minella Kapo, Koli Gaqi, Profit Canaj, Zyhdi Çoba, Lluka Heqimi dhe Isuf Saliçe, me kontribute të çmuara në dobi të rritjes dhe përmirësimit të shëndetit të sportistëve cilësorë dhe zhvillimit të aftësive të tyre fizike.
Angazhimi i tyre jetësor dhe profesionalizimi i dëshmuar ka ndikuar jo vetëm në të gjitha rezultatet e larta të sportit shqiptar, por ka qenë gjithmonë një nxitje për të rinjtë dhe të rejat për t’u mos u larguar nga sporti, si mjeti më i mirë për mbrojtjen e shëndetit dhe distancimit nga veset.
Të mbështesim dhe të investojmë më shumë në mjekësinë sportive, për të arritur rezultate të larta dhe cilësore në të gjitha disiplinat.
