Sot, i madhi Robert Radoja, feston ditëlindjen. Është një nga emrat më të rëndësishëm e të spikatur të kompozicionit por edhe mësimdhënies si pedagog. Pavarësisht se jeta nuk është treguar gjithmonë bujare me re, Radoja ia ka dalë gjithmonë, duke qenë një figurë e spikatur e artit shqiptar për shumë e shumë vite, edhe aktualisht.
Robert Radoja (Bolonja, 15 prill 1938) është një kompozitor dhe pedagog shqiptar. U lind në Bolonja. Në vitin 1951 fillon studimet në Liceun Artistik në Tiranë për piano. I mbaron ato në vitin 1959. Në vitin 1962 fillon studimet e larta në Konservator ku edhe diplomohet për Piano në vitin 1966. Po në këtë vit fillon punën në Pallatin e Pionierëve në Tiranë në sektorin e Muzikës.
Gjatë kësaj periudhe ai orkestron këngë të muzikës së lehtë duke qenë prezent në rreth 40 festivale si ato të zhvilluara në Radio Televizion ashtu dhe ato të Këngës për Fëmijë. Në vitin 1981 emërohet Redaktor i Muzikës në kinostudion “Shqipëria e re”. Në këtë detyrë ai do të punojë deri në vitin 1986. Robert Radoja që prej vitit 1985 do të jetë edhe pedagog në Akademinë e Arteve, Dega Piano, si dhe pedagog për Muzikën e Dhomës dhe Shoqërime në klasën e Flautit . Kompozimi i tij i parë në muzikën filmike do të jetë në vitin 1970 me muzikën e filmit “Guximtarët”. Në Festivalin e 41-të në Radiotelevizion, të zhvilluar në Tiranë prej datës 13 deri në 15 dhjetor të viti 2002, puna e tij e palodhur në vite do të vlerësohej me “Çmimin e Mirënjohjes”. Radoja mban titullin e lartë e të merituar “Mjeshtër i Madh”.
Si rrallëherë, i madhi Robert Radoja ka folur për jetën e tij private në një intervistë para rreth 1 viti. Ai ka treguar se bashkëshortja i ka vdekur herët dhe i ka rritur djemtë vetë. Sakaq, zbuloi gjatë rrëfimit se si është njohur me gjysmën e tij.
“Unë kam dy djemtë të dy janë marrë me muzikë. Bashkëshortja më ka lënë herët dhe i kam rritur vetë. Edhe ajo ka qene këngëtare shumë e mirë dhe ka luajtur në filma si amatore se nuk ka bërë shkollë. Ka luajtur tre filma, kryesisht ka kënduar shumë bukur. Në festivalin e 9, 10 dhe 11, ishte në atë grupin që shoqëronte këngët. Nuk e kam zbuluar unë si talent, e kam gjetur atje. Kanë qene dhe të tjerë para meje, si Tonin Harapi, i cili ndenji për pak kohë se shkoi si pedagog në Akademinë e Arteve. Pata fat që e gjeta në atë mënyrë, se munda të vazhdoja me dhënë një kontributë”.
Më tej, Radoja tha se vazhdon të shkruajë ende muzikë, por jo me kompjuter dhe kjo ia bën më të vështirë.
“Unë vazhdoj të shkruaj muzikë me dorë se kompjuterin nuk e mësova dot kurrë. Do të ishte një lehtësi shumë e madhe sepse ke mundësi që ta dëgjosh atë që bën në kompjuter, kurse kështu duhet ta përfytyrosh tingëllimin. Nuk është pa dobi asnjëra, as tjetra. Mundohem”
