Një tjetër talent shqiptar i futbollit me potencialin për t’u rritur shumë në karrierë është duke u shuar. Donis Avdijaj nuk konsiderohet më si një nga “xhevahirët” e skuadrës gjermane Shalke 04, por si një problem të cilit nuk po i gjendet zgjidhje. Sipas “Bild”, sulmuesi 20-vjeçar i përfaqësueses së Kosovës është lënë jashtë listës së ekipit që do të udhëtojë drejt Austrisë për fazën përgatitore. Ai ishte pjesë e skuadrës gjatë udhëtimit në Kinë, por nuk ka arritur ta bindë trajnerin që e ka kuptuar sjelljen e gabuar të disa ditëve më parë në lidhje me vonesën e paraqitjes në stërvitje. Gjithashtu Avdijaj nuk ka bindur as me gjendjen e tij fizike. Eksperienca e 20-vjeçarit me Shalken duket shumë pranë fundit tashmë, por ende nuk dihet nëse klubi gjerman do ta dërgojë në skuadrën U-23, do ta huazojë apo do ta shesë./panoramasport/
