Shënim i ShkodraWeb
Në 3 italianë, njëri ka votuar “Levizjen 5 Yje” të krijuar nga komiku Bepe Grillo por të drejtuar në këto zgjedhje nga Di Maio. Partitë populiste qartazi kanë triumfuar, nëse do ti bashkohet rezultatit të “5 Yje” ai i Lega-s së Salvinit, në çdo 2 italianë njëri ka zgjedhur populistët.
Berluskoni 81- vjeçar ja doli të ngrejë në krye Qendrën e Djathtë, por duke i hapur krahun Lega-s brenda koalicionit. Shumë kush e konsideron fitore të Di Maio, por në fakt është e Lega-s së Salvinit. Ai ja ka dalë të katërfishojë votat krahasuar me 2013-ën, tanimë jo si Lega Norg por thjesht Lega.
Humbësi i madh i zgjedhjeve është ish- kryeministri Renzi, i cili e katandisi Partinë Demokratike në kufinjtë e 20%. Sipas gjasave apo sipas moralit politik, Renzi duhet të hapë krahun brenda partisë së tij, e cila në fakt u dëmtua nga shumë faktor, por sidimos nga përçarja e brendshme.
Gradualisht, në Itali po përvijohet një skemë e ndarjes së votave. Vullneti i italianëve ka qenë i qartë, por në finale verdikti është disi i çuditshem: Asnjë nga koalicionet apo partitë nuk mund ta krijojë qeverinë e re. Mungojnë numrat dhe në disa raste, edhe bashkimet mekanike të votave nuk mjaftojnë, edhe pse do të ishte një “kapërcim ylberi” politik.
“Levizja 5 Yje” si forcë e parë politike, do të kërkojë ndërtimin e qeverisë. Askush nuk mund të thotë se nga do ti marrë votat që i mungojnë. Qoftë në të majtë, ashtu dhe në të djathtë, kjo forcë politike është parë me armiqësi. Edhe pse duket e pabesueshme, mendoj se me i mundur është një koalicion Qendër Majtë- Qendër e Djathtë. Shëmbulli mund të jetë Gjermania, e cila para pak orëve vendosi rikonfirmimin e një koalicioni të ngjashëm qeverisës. Por mbase, si në Gjermani, do të duhet një kurban dhe në këtë rast, do të jetë Renzi si humbës i zgjedhjeve.
Edhe një koalicion “Lëvizja 5 Yje” me Lega-n, duket thuajse i pamundur sepse spektri politik do të hapej gjërësisht nga ekstremi i majtë në ekstremin e djathtë, pa folur për programet politike aspak të ngjashme. Nga ana tjetër, vështirë të mendohet për momentin, një çarje e brendshme e koalicioneve qoftë të Berlusconi-t apo edhe të Renzi-t.
Ka edhe një alternativë tjetër, sipas meje më e mundshmja. Nëse brenda pak javëve nuk do të mund të krijohet një qeveri me mbështetje solide, mund të lind një qeveri me mbeshtetje nga jashtë. Por historia e re ka treguar se përgjithësisht ato janë teknike. Në kuptimin e jetëgjatësisë së tyre por edhe asaj çfarë marrin përsipër për të bërë. Nëse futemi në këtë skemë, zgjedhjet e parakohëshme politike në harkun kohor të jo më shumë se 2 viteve, janë alternativa më e mundshme