![](https://www.shkodraweb.com/wp-content/uploads/2022/11/rama-berisha-permbytje-fotomontazh.jpg?x28643)
Pak para orës 16:00 kryeministri Edi Rama u shfaq tek “Harku i Berdicës” në Shkodër. Motivi i vizitës, përmbytjet e ditëve të fundit në Shkodër. U prit nga prefektja Angoni, kryetari i Këshillit të Qarkut Lakti e shumë zyrtarë të tjerë vendorë. Protagoniste ishte Elisa Spiropali, ministre e qeverisë “Rama”, por më shumë këto kohë, drejtuese politike e PS- së Shkodër. Me këtë cilësi të vetme, duke marrë pjesë edhe në dëgjesat publike të Bashkisë Malësi e Madhe. Nejse, muhabet tjetër ky…
Rreth orës 17:20, mediat u njoftuan se Rama do të ishte “live” nga “Harku i Berdicës”. Sigurisht, direkt në Facebook, rrjete sociale e media, por me regjistrim, pasi video ishte miksuar për bukuri dhe i gjithë takimi, ishte komprimuar në vetëm 6 minuta e 20 sekonda. Qethur mirë e mirë nga profesionistë, të cilëve u duhet dhënë haku për punën fantastike në kurimin e imazhit të kryeministrit, takimi iu paraqit atyre që e hëngrën “sapunin për djathë”, si përgjigje për akuzat e një dite më parë të ish- kryeministrit Berisha po nga Shkodra. Shefi i opozitës u shpreh se Shkodra u përmbyt nga hapja e portave të shkarkimit të HEC- eve në kaskadën e Drinit.
Qëllimi i kësaj dalje “flash”, u provua vetëm pas pak minutave, kur kryeministri publikoi një video ku Berisha paraqitej me deklaratat e tij në dy kohë: 2010- ën kur ishte kryeministër në përmbytjet biblike në Shkodër dhe në 2022- in kur në Shkodrën e përmbytur, erdhi si lider i PD- së dhe opozitës. Pra, Rama erdhi në Shkodër për të justifikuar publikimin e një video rreth 40 sekonda, që mund ta ndiqni më poshtë.
Pak a shumë, në garën mes “mëkatarëve” kryeministra që përmbytin Shkodrën të paktën nga 2010- a e këtej, Rama u tha shkodranëve “unë ju përmbyta, por më pak se Berisha”. Edhe pse, Rama u ndal tek 2010- a duke harruar të paktën edhe dy përmbytje të tjera, jo pak të rëndësishme, si ato të 2018- ës dhe 2021- it.
Por ashtu siç pëlqente dikur Ramës ta kujtonte, me “1 milion shuplaka” në 2013- ën, Berisha u largua nga pushteti edhe nën peshën e përmbytjes së 2010- ës, ndoshta edhe ndonjë tjetre. Rikthimi krahasimor i Ramës, kujton periudhën e para 1990- ës, kur shteti komunist, për tu mburrur me arritjet e tij, e krahasonte çdo gjë me vitin 1938, kur vendi qeverisej nga Ahmet Zogu si mbret.
Natyrisht, jemi në fushën e luftës politike. Por natyrisht, në një farë mënyre, megjithë shpopullimin, varfërinë e dyshimet e arsyeshme për tjetërsimin e votës, janë shkodranët e shqiptarët që kanë në dorë fatet e Berishës e Ramës, e përmes tyre, edhe fatet e tyre. Nëse ka akoma nga ata që besojnë se mund të jetojnë e punojnë në këtë tokë.
Përtej tifozllëkut politik, ata banorë që përmbyten thuasje rregullisht nga 2010- a dhe jo për faj të tyre, vazhdojnë të jenë me sytë nga qielli dhe nga qeveritë. Atyre nuk u interesin kush ishte kryeministër në 2010- ën, 2018- ën apo 2021- in. Ata kërkojnë të zhdëmtohen dhe që situata të tilla, të mos përsëriten më. As një herë në 100 vjet mundësisht! Një gjë është e sigurtë, as demokratë, as socialistë, as në 2010- ën e as në 2022- in, nuk i kanë thënë as Ramës e as Berishës “s’ ka problem që na përmbyte se ne jemi me ty”. /Nga Blerti DELIJA/