Në ditët e para të shtatorit 2021, teksa Lulzim Basha zyrtarizonte vendimin e imponuar për pezullimin e Sali Berishë nga Grupi Parlamentar i PD- së që pritej të krijohej në Kuvend pas zgjedhjeve politike të atij viti, Gazment Bardhi po bëhej gati të kthehej në një nga kundërshtarët më të vendosur të ish- kryeministrit, i shpallur “non grata” nga SHBA- të në maj të të njëjtit vit.
Sot, pas më shumë se dy viteve, Gazment Bardhi gjen “rrugën” për tu rikthyer sërish në PD- në e Rithemelimit, pas një kontributi të dukshëm, të qenësishëm edhe të mbrapshtë për të çuar PD- në në derexhenë që e dinë të gjithë. E si të mos ketë ndodhur asgjë, në krah të numrit 2 të PD- së së Rithemelimit, Flamur Noka, ndër mbështetësit e palëkundur të Doktorit, Gazment Bardhi shfaqet në Shkodër, në bastionin historik të së djathtës.
Pse iu desh kaq shumë kohë Gazment Bardhit të gjente “rrugën”? Ndoshta kjo është pyetja që bëjnë sot shumë demokratë të të gjitha niveleve, edhe nga ato që me 8 janar 2022, morën shkopinj kokës e trupit nga individë të dirigjuar e organizuar brenda selisë së PD- së me dyer e dritare të blinduara. Pse pikërisht pas vizitës në SHBA, Bardhi u shfaq fillimisht në “Rrugën e Shpresës”, më pas në selinë blu duke drejtuar mbledhjen e deputetëve demokratë? Çfarë ndryshoi në kaq pak kohë?
Dëmet që i ka shkaktuar PD- së Gazment Bardhi, janë të rënda, me pasoja afatgjata mbi dy vjet dhe nuk dihet se kur do të mbyllen. Ai ishte arkitekti- jurist i tërë sulmeve ndaj PD- së së Rithemelimit, të cilën sot, në një moment “reflektimi” e cilëson shumicë. Për shkak të tij, këmbënguljes së pashpjegueshme, PD- ja dhe fati i saj juridik, endet akoma dyerve të gjykatave.
Përmes pozicionit të tij, firmës e vulës, Lulzim Basha “u dorëhoq”, duke i lënë në dorë PD- në Bardhit, i cili në shkelje të Statutit mbi të cilin përbetohet sot, emëroi Enkelajd Alibeajn si kryetar. Me të njëjtët mekanizmi, mundësoi sërish rikthimin e Bashës në skenë e sot, i njohur nga strukturat e shtetit si përfaqësues zyrtar i PD- së.
“Të gabosh është njerëzore por të thellohesh në gabim, është djallëzore”, thotë një shprehje e famshme, e cila personifikon qasjen e Bardhit deri para disa javëve. Iu deshën më shumë se 2 vite që ai të kuptonte kush e ka shumicën e demokratëve, Basha apo Berisha, në një kohë që edhe përfaqësues të mazhorancës qeverisëse, e deklaronin hapur nga është ajo.
Gazment Bardhit iu deshën 2 vite për të shkatërruar me veprime dhe mosveprime strukturat, në të gjitha nivelet, duke dekurajuar edhe demokratët më qendrestarë nga Vermoshi në Konispol. Jo vetëm aq por edhe tani, pavarësisht se e njeh si kryetar të PD- së Rithemelimit, ai thotë se do të preferonte një lidership tjetër në vend të Berishës.
E në Shkodër, vjen e pritet si triumfator, si shpëtimtar jo vetëm i opozitës por edhe i Shqipërisë. Edhe pse e ka patur përballë nga 2013- a, sot ai u kujtua se kauza më e rëndësishme është bashkimi i PD- së dhe demokratëve përballë Edi Ramës. Sot ai u kujtua të takojë shkodranët në kafe për ti kujtuar se duhet të protestojnë me 20 shkurt.
Si çdo njeri, edhe Gazment Bardhi gabon. Është mëse normale. Por është më normale që të kërkosh ndjesë publike për të gjitha dëmet që i ka sjellë këto 2 vitet e fundit demokratëve, PD- së, opozitës, Shqipërisë së sotme dhe të neserme, duke shkatërruar forcën e parë opozitare në vend pas 45 viteve diktaturë. Duhet të bënte një ndjesë publike të thellë, fillimisht ndaj atyre që i kishte rrotull sot por edhe ndaj të gjithë shqiptarëve, për shembullin e keq që ka dhënë, atë të përçarjes së opozitësvetëm për interesa personale. Sot, nuk ka asnjë dyshim!
Opozita është pushteti moral i çdo vendi. Gazment Bardhi nuk mund të jetë sot simboli i bashkimit, i një bashkimi që vjen nga qendra dhe që në fakt, duhet të niste nga antarësia. Në emër të moralit, pas pranimit publik të gabimeve, Bardhi në Shkodër duhej të deklaronte dorëheqjen. Fillimisht si kryetar i Grupit Parlamentar të PD- së, më pas edhe si deputet. Do të duhej të ishte nga sot, një anëtar, militant i thjeshtë në mes demokrateve, duke “paguar” për dëmet e mëdha që i solli PD- së këto dy vjet. Vetëm kështu do të tregonte pendesë dhe do të tregonte se PD- ja vjen para interesit të tij personal.
Historia e trishtë e PD- së ka njohur edhe “epokën e gjeneralëve të 1997- ës”. Por edhe ata, nuk u ngjiten menjëherë, duke bërë pak “gavetë”, aq sa duhej, për të riparuar imazhin e tyre tek demokratët. Ndërsa sot, Gazment Bardhi erdhi sërish si gjeneral, pa iu hequr asnjë ashkël si kur dy vitet e fundit të mos ekzistonin fare. Aq më tepër, kur askush nuk i atribuon kredite apo merita brenda PD- së që kur është pjesë e forumeve të larta të saj.
Pas rreth 1 viti, ky vend do të jetë në zgjedhje. Me vulë, pa vulë, me logo, pa logo, PD- ja e Rithemelimit do të jetë pjesë e zgjedhjeve politike 2025. Llogaritë janë të thjeshta, siç edhe të shumë deputetëve aktualë apo aspirantë “të penduar”. Edhe nëse ka vulë e logo, PD- ja e Bashës vështirë të konkurrojë PD- në e Rithemelimit për numër deputetësh. Gazment Bardhi e di se ka më shumë shanse të jetë sërish deputet duke iu atashuar PD- së së Rithemelimit. Tashmë me imazhin e “misionarit të bashkimit”, e ka edhe më të lehtë të qëndrojë në maje. E përsëri, ai do të vazhdojë të jetë “i rëndësishëm”, falë votave të demokratëve.
Një pjesë e të cilëve kanë akoma të freskëta goditjen në oborrin e selisë së tyre me 8 janar 2024. E gjithë kjo, nuk mund dhe nuk duhet të merret thjesht dhe vetëm si çeshtje e demokratëve, militantëve apo simpatizantëve të PD- së. Kjo forcë politike do të vijë në pushtet pasi e synon atë. Dhe Gazment Bardhi do të jetë një qeveritar i rëndësishëm, ashtu siç edhe në 2017- ën, pas marrëveshjes së famshme të 17- 18 majit, nga ku nisi skenari që po e vuan akoma PD- ja, opozita, Shqipëria! Më mirë djepi bosh sesa djalli në të! /Shënim i ShkodraWeb/
