Abdurrahman Fangaj kthehet përsëri në Shkodër pas shumë vitesh “emigrim” larg qytetit të lindjes. Futbollisti i talentuar, pjesë e Laçit në katër edicionet e fundit, tashmë i është bashkuar Vllaznisë, për të vazhduar karrierën e tij në radhët e kuqebluve.
Vllaznia ka prezantuar lojtarin, por duke shpjeguar se kjo firmë është me kusht, në varësi të situatës se mbrojtësit i cili është ende duke u riaftësuar nga dëmtimi që pësoi në fundin e edicionit të kaluar.
“Vllaznia ka bërë realitet sot edhe një tjetër firmë në kontratë. Drejtuesit e klubit në përpjekje për të ndërtuar një ekip cilësor, vijojnë edhe punën për rikthimin e futbollistëve të talentuar shkodranë që kanë luajtur me ekipet e tjera. Dhe i rradhës që rivishet kuqeblu është mbrojtësi Abdurraman Fangaj. Pas disa sezonesh aktivizimi në rradhët e Laçit, tashmë 23 vjeçari do të jetë pjesë e Vllaznisë.
Lojtari është në fazën e rikuperimit pas një ndërhyrje kirurgjikale që ka bërë kohët e fundit dhe për këtë arsye sot ka firmosur një parakontratë me klubin tonë e cila do të hyjë në fuqi në janarin e vitit të ardhshëm. Me Fangajn është rënë dakord që ai të jetë pjesë e skuadrës së Vllaznisë për 3 sezonet e ardhshme. Mirë se erdhe në shtëpi Abdurrahman!”, shkruhej në njoftimin e Vllaznisë.
