Deputeti Myslim Murrizi pritet të krijojë këtë enjte në Parlament grupin e ri parlamentar të Partisë Demokratike. Pas vendimit të ish-deputetëve të PD-së për të djegien e mandateve, Murrizi e sheh të domosdoshme krijimin e një grupi të ri në Kuvend, ku synimi kryesor do të jetë ndryshimi i sistemit zgjedhor.
I kontaktuar nga “Panorama”, Murrizi garanton se gjithë deputetët që kanë marrë mandatin nën logon e PD-së, do të grupohen në një grup të ri parlamentar.
“Sigurisht që i kam kontaktuar të gjithë kolegët e mi, të cilët kanë marrë mandate me siglën e Partisë Demokratike. Kam marrë dakordësinë e tyre, por më konkretisht do të ulemi për ta finalizuar këtë nismë. Po jua them me bindje se ditën që do të jemi 7 deputetë të PD-së në Parlament, do të krijojmë grupin tonë parlamentar, njësoj siç e thotë edhe rregullorja e Kuvendit. Ditën që do të bëhemi 7 anëtarë nga lista e PD-së do të bëhemi grup, ne nuk do të funksionojmë individualisht”, deklaron Murrizi.
Ndonëse është ai që ka marrë iniciativën për krijimin e këtij grupi të ri parlamentar, Murrizi nuk shfaq ambicie për drejtimin e tij, duke lënë rrugë të hapur për deputeten Rudina Hajdari.
“Unë s’jam iniciator, por këtë vendim e kam marrë si më i vjetër dhe me më shumë përvojë në radhët e kolegëve. Edhe deputetët e tjerë të PD-së e mbështesin idenë për krijimin e një grupi dhe të mos funksionojmë individualisht. Duhet që minimalisht të kemi një staf, i cili të na nisë rendin e ditës për seanca dhe komisionet parlamentare. Mbasi të konstituohet grupi parlamentar, le të zgjidhet kushdo që kolegët kanë dëshirë për drejtimin e grupit. Pjesë e këtij grupi do të jetë edhe Rudina Hajdari. Në fakt, nuk është ndonjë emocion i madh të jesh udhëheqës i një grupi parlamentar kur je në opozitë. Nuk jam nga ata që rrinin në prehrin e Bashës për të qenë në krye të grupit parlamentar. Unë e thashë, nuk e kam me dëshirë të madhe. Le të zgjedhin kolegët kë të duan”, sqaron deputeti i PD-së.
NEGOCIATAT
Lidhur me ndryshimet e sistemit zgjedhor një javë më parë, Murrizi pranon se ka diskutuar edhe me kreun e Grupit Parlamentar të PS-së, Taulant Ballën.
“Objektivi kryesor i krijimit të këtij grupi të ri parlamentar do jetë ndryshimi i sistemit zgjedhor. Është sistemi më bastard që ka pasur një vend ish-komunist. Ne do të këmbëngulim vetëm për listat e hapura. Në Kuvendin e Shqipërisë do të duhet të hyjnë vetëm ata që duan qytetarët shqiptarë. Në seancën e kësaj të enjteje jam ulur dhe kam diskutuar rreth 20 minuta me Taulant Ballën për këtë kërkesë të përfaqësuesve të opozitës. Në këtë bisedë i kam thënë të më gjejë një vend tjetër, që ka sistemin zgjedhor që ka Shqipëria. Më tha se maxhoranca është e hapur për të dëgjuar çdo kërkesë nga opozita. I kam thënë se, nëse i do votat e opozitës, ato do të jenë vetëm për ndryshim të sistemit zgjedhor. Në të kundërt, të blejnë deputetë njësoj siç kanë bërë deri tani”, thekson Murrizi.
ZGJEDHJET
Deputeti demokrat është i bindur se zgjedhjet vendore mund të zhvillohen edhe pa pjesëmarrjen e Partisë Demokratike. Sipas tij, rasti i Malit të Zi është treguesi më i mirë për këtë situatë. Murrizi e cilëson të gabuar vendimin e PD-së për të mos paraqitur kandidatët e saj për zgjedhjet vendore që në muajin janar të këtij viti, duke paralajmëruar se nëse Basha do të vendosë për të mos hyrë në zgjedhjet vendore, disa prej kryebashkiakëve aktualë të PD-së do të garojnë pa logon e partisë së tyre.
“Patjetër që zgjedhjet vendore mund të realizohen edhe nëse PD-ja do të refuzojë të marrë pjesë. Do të dalin parti të tjera. Është shembulli i Malit të Zi. PD-ja, kandidatët duhet t’i kishte nxjerrë që në muajin janar. Nëse Basha do të vendosë të mos hyjë në zgjedhje vendore, disa prej kryebashkiakëve aktualë kam informacione se do kandidojnë pa logon e PD-së”, deklaron deputeti i PD-së. /Burimi:PanoramA/
